Lawngtlai, December 10, 2021 : Lawngtlai Prayer Mount-a Tawngtaina In (Prayer Cabin) sak thar panga chu Upa C. Ngunlianchunga'n vawiin, December 10, 2021 khan a hawng.
Tawngtaina In hawnna inkhawmna tawi buatsaihah khuallian leh Tawngtaina In hawngtu Upa C. Ngunlianchunga chuan, Lawngtlai Prayer Mount hmun chu thangthar lo kal zel turte tana malsawmna a nih theih chu a duhthusam ber a nih thu a sawi a. Helai hmun atanga Pathianin mi tam tak a chher chhuak thin tih a hriat avangin a lawm thu a sawi a, Upa C. Ngunlianchunga chuan helai hmunah hian Pathian a lo auh tawh thu a sawi bawk.
Upa C. Ngunlianchunga chuan, 'helai tlang ah Pathian thlarau a awm a, helai hmun hi rilrua harsatna neite tan leh Zalenna hmuhna hmun anih zel theih nan leh Pathiana tuihalna neite tana hahchawlhna a lo nih zel ka beisei a ni' a ti.
Rev. F. Raldawna, Vice Chairman; Lawngtlai Prayer Fellowship chuan Tawngtaina In hawn inkhawmna hi a kaihruai a, Pu Vanlalvuana, Secretary hnen atangin report ngaihthlak a niin, Pi F. Sangvuani Treasurer hnen atangin lawmthu sawina ngaihthlak a ni bawk.
Tun dinhmunah Lawngtlai Prayrer Mount-ah hian Tawngtaina In (Prayer Cabin) 23 a awm mek a. Heng Cabin te hi chhungkaw hrang hrang ten an hmangaih kaltate hriatreng nan an pualin Prayer Fellowship hruaitu te remtihnain Lawngtlai Prayer Mount-ah hian an sa thin a ni.
Vawina cabin hawnte hi Rev. MZ. Lawmthanga leh a nupui puala sak te, Upa F. Thangluaia leh a nupui puala sak te, Upa T. Tialvunga leh a nupui puala sak te, Upa H. Hrangkhuaia leh a nupui puala sakte leh Pi Lalawmpuii hriatreng nan Pi Hrangmawii Vanphawng leh Pi Lalrinmawii Erhlawt sak te an ni.
Lawngtlai Prayer Fellowship hi Tawngtaina Tlang Buaipuitute tih hming puin kum 2010 khan din a ni a, kum-2011 atang khan Lawngtlai Prayer Fellowship tia thlak a ni ta a ni. Tun dinhmunah Tawngtaina Tlang ah hian Tawngtaina In (Prayer Cabin) 23 a awm mek a ni.
Post a Comment