Lawngtlai, January 20, 2022 : January 6, 2022 a Nghalimlui khua Pi Sadin Mela (41) rawng taka thattute man chhuah an ni a. Vawiin January 20, 2022 khan heng tualthattu mante hi Lawngtlai Police Station thlenpui an ni a, tualthah thubuai awrhtir niin, Court-in hrem an nihna tur a la puang chhuak dawn a ni.



Pi Sadin Mela-i thihna chungchang hian a chhung ten Vaseikai Police Station-ah FIR an thehlut a, a tuk January 7, 2022 atangin Vaseikai Police te chuan hnuchhui hna an tan nghal. Vaseikai Police te chuan Pi Sadin Mela-i thih nia ram leh Nula lam kal zawng an hriat theih ang angte thu an zawt fiah a, Tin, hemi ni hian mi pakhat zing dar 10 vela Pi Sadin Mela-in te Nul lama a kal an hmu a, dar 12 velah a haw lam an hmu bawk. Midangin mi pahnih ram vak an hmu bawk. Hengmite pawh hi thu zawh fiah an ni a, thu chiang engmah an la hre chhuak thei lo. Vaseikai Police te chuan Pi Sadin Mela thattu nia an rinhlelh mi pakhhat Drao Kumar-a chu an zawt fiah leh a, a kekawr hak hnuaia kekawr bul a hakah chuan thisen kai an hmu a, a ni chuan a thisen kai chu Balhla hnai a ni tih a sawi a. Hei hi FSL ah thawn niin, mihring thisen ngei a ni tih an finfiah a. Mihring thisen a ni tih finfiah hnuah Drao Kumar hi Police te hian an kova. Drao Kumar hian ramah mi pahnih a hmuh thu leh, mi pahnihte hian Pi Sadin Mela-i an that lai a hmuh thu leh an silaia an tin thu leh mi ruang chu zawnpui tura an tih thu a sawi a, chuta tanga thisen pawh chu kai a nih thu a sawi a. Mi ruang chu luiah an zawn phei thu leh a thawmhnawte an phelh sak thu a sawi bawk.

Police te hian silaia tintu mi pahnihte chu zawng chhuakin thu an zawtfiah leh a, a tirah an inpuang lova, Police te hian a chhui hna an thawk zel a, mi pahnihte hi an in lamah chhuiin January 18, 2022 khan anmahni thah ngei a ni tih an inpuang a, an zingah hian mihring thisen kai Drao Kumar pawh a tel tih an sawi. Tualthattu mi pathumte hi Nghalimlui khua khua vek an ni. Vaseikai Police te hian nimin khan dan ang takin heng mi pathumte hi an man a ni. An inpuanna dan Pu Lalremsanga Sailo, OC Vaseikai PS sawi danin, heng mi pathum tena Pi Sadin Mela rawng taka an thahna ruahmantute hi Drao Kumar leh Debakala te an ni a, Debakala leh Pi Sadin Mela-i te hi an inhnial thu a sawi bawk. An inhnial hnuah Debakala hian chemin Pi Sadin Mela-i tukhumah vawi hnih a sat a, hemi hnu hian Drao Kumar hian a hmuiah vawi khat leh a serhah vawi thum a zai bawk. 

Vaseikai Police-te chuan Pi Sadin Mela hi heng mi pathumte hian an pawngsual ngei em tih finfiah a ni lova, test result nghah mek a ni an ti. 

Pi Sadin Mela thattu mi pathum Vaseikai Police ten an mante chu hengte hi an ni.

1. Drao Kumar (30) S/o Joy Moni of Nghalimlui

2. Debakala (34) S/o Bido Muni of Nghalimlui

3. Onil Kumar (23) S/o Puito Chandro of Nghalimlui

Nghalimlui YLA hruaitute chuan an khaw mi Pi Sadin Mela thattu chu an khua mi leh sa ngei a nih an rin thu an lo sawi tawh a. Tualthattu hi mi pakhat aia tam an nih an rin thu an lo sawi tawh bawk a ni. 

January 6, 2022 khan Pi Sadin Mela hi an Nul a kal turin a chhuak a, tlai lam a haw huna a haw mai loh avangin a chhungte mangang chuan khawtlang an pun a, hemi zan hian khawtlang chuan khua atanga KM 5 vela hla, Luinalah a ruang hi tuia bawkkhup chunga a mu an hmu a, a lo thi tawh a ni. 

Khawtlang hruaitute sawi danin Pi Sadin Mela hian kawr chauh a ha a, a hnuai lam chu ruak vekin a awm a. A tukhumah chema sahna hmun hnihah awmin, a hmuiah an sat bawk a, a serh bul velah hmun thumah zaina hnuhma a awm bawk. Khawtlanga mi thenkhat chuan Pi Sadin Mela hi pawngsual a nih hnuah rawng taka thah a nih an ring. 

Post a Comment

Powered by Blogger.