RAUTHLA NEWS LAWNGTLAI

Rauthla 16.09.2024 : Ruihhlo ngaite leh hmeichhe rahbi tleute enkawlna leh chhawmdawlna hmun, Baptist Church of Mizoram (BCM) hnuaia Mizoram Baptist Kohhran Hmeichhe Pawl (MBKHP) enkawl Chhawmdawlna In, Melte chu tukin khan Lunglei District Bawrhsap Pu R. Lalṭhazuala chuan tlawhin, an hma lakna a enpui.

Lunglei Bawrhsap Pu R. Lalṭhazuala hi Additional Deputy Commissioner Pu James Miahlung leh District Information & Public Relations Officer Pu C. Lalhruaitluanga te'n ṭawiawmin, Chhawmdawlna Ina thawktute'n an lo dawngsawng a. Chhawmdawlna In hmunhma leh building hrang hrangte lo fanpui, an hma lakna leh hmachhawp an neihte an lo hrilhfiah a ni.

Bawrhsap Pu R. Lalṭhazuala chuan ruihhlo ngaite enkawlna leh chhanchhuahna kawnga Chhawmdawlna In hma lakna chu fakawm a tih thu sawiin, an taksa mamawh ngaihtuahsak leh Pathian thua enkawlna piah lamah, rilru leh taksa hrisel nei tur leh chhawr tlak thiam thil nei tura zirtirna leh kaihhruaina an pe chu lawmawm a tih thu a sawi a. Ruihhlo dona leh ram siamna kawnga sawrkar hma lakna tichaktu leh chhawk zangkhaitu pawimawh tak an ni tih sawiin, an rawngbawlna chu ṭha taka chhunzawm zel turin duhsakna a hlan a. Chhawmdawlna In tan hian ṭanpuina thilpek a hlan nghal bawk.

MBKHP Chhawmdawlna In hi kum 1997-a din kha niin, tunah hian Project Manager hovin thawktu mi 25 an awm a. Chhawmdawlna Ina enkawl lai hi mi 87 (mipa 68 leh hmeichhia 19) awmin, an dinhmun azirin hunbi fel tak siama enkawl an ni ṭhin a. An taksaa harsatna an hneh theih nana enkawl bikna leh anmahni kawmna leh thu ṭha fahna (counselling) te kalpui a nih bakah, mahni kutkawiha ding thei tura thiam thil chi hrang hrang zirtirna te kalpui a ni a. Hmeichhe tan puan ṭhui leh la phiar zirna kalpui niin, mipa tan thing mistiri (carpentry) leh khawl thil siam (electronic wiring & repair) zirna te kalpui a ni bawk.

 SAITUAL POLICE TEN HEROIN MAN

Rauthla 15.09.2024 : Dt.13.09.2024 zan khan Saitual Police Station team-te chuan Keifang Dawrkawnah beihpui thlakin lirthei pakhat (Sumo B/R No. MZ01L-2167) Champhai atanga Aizawl lam pan chu lo tidingin, ngun taka lirthei an dap hnuah heroin ni ngeia hriat, gram 592.57 a rit (hawng 50), ₹.17,76,000 man hu chu he lirthei a chuang pakhat Ni Dun Lian (41) s/o Liankung (L), Ngailan Village, Myanmar nia inchhal kut atangin an man.

Saitual PS Case No.47/2024 Dated 13.09.2024 u/s 21(C) ND&PS Act r/w 14 Foreigner Act ziah luh niin ngawrh taka a kaihhnawih awmte chhui zui mek a ni.

 Rauthla 13.09.2024 : Vawiin khan Lai Autonomous District Council a thawktute chuan Office chhung leh a chhevel tihfai hnatlang an nei. LADC Secretariat bakah Lai House Aizawl, Rest House, Sub-Hqrs leh Divisional Office ah te pawh Faina hnatlang hi thawk vek a ni.

Lai Autonomous District Council a Chief Executive Member Pu C.Lalmuanthanga chuan, sorkar laipuiin Swaachata Hi Sewa (Faina beihpui thlak) a kalpui hi Lai Autonomous District Council chuan tha a ti hle a. Kristian kan nih avang ringawt pawh hian Faina leh thianghlimna kawngah hian hma la tur kan ni a. Tuna hnatlang kan thawh bakah pawh kan Office leh a vel ani emaw kan room vawnfai kawngah pawh tan kan lak thar a, kan chhunzawm zel pawh a ngai dawn a ni, a ti a. Sorkar laipui hmalakna tihlawhtlingtu ni turin theihtawp kan chhuah zel dawn a. Office min lo dawrtu te pawhin Faina leh thianghlimna kawngah hmasawn kan ngaihzia hria a, min vawn thinghlim pui turin ka ngen bawk a ni, a ti a. Faina leh thianghlimna kawngah nasa lehzual a hma kan sawn zel theihna turin ram mipuite pawhin tan ila thar zel ang u, tiin ngenna a siam bawk a ni.

Pu C.Lalmuanthanga chuan, Faina leh thianghlimna chu ngaiah neih a tul thu sawi a, hnam changkang apiangin faina leh thianghlimna an ngaipawimawh tih sawiin, sorkar pawhin kan phak ang tawk zelin tan kan la thar zel dawn a. Keimahni theuh hi kan pawimawh ani tih hria a, tan kan lak chhunzawm zel a ngai a ni, a ti bawk.

Vawiina Faina hnatlang ah hian Lai Autonomous District Council Executive Secretary Pu K.Lalthanzara chuan thuchhuah siam in, ‘Faina hnatlang ah tumah leave lak phal a ni lova. Mahni Department / Office theh ah attendence lak tur ani’ tiin thuchhuah a siam a. LADC a thawktute pawhin sorkar thuchhuah ngaipawimawh a, hnatlang an thawk thei chu lawmawm a tih thu leh sorkar pui hmalakna chu theihtawp chhuahin kan chhunzawm zel dawn ani, a ti bawk.

Lawngtlai bakah Lai House, Aizawl leh Sangau, Bualpui 'NG', Vathuampui leh Bungtlang South-a LADC Office ahte neih a ni bawk a ni.