RAUTHLA NEWS LAWNGTLAI

LAWNGTLAI DEPUTY COMMISSIONER IN PMMSY HNUAIA SANGHA DIL ENKAWL MEK A HMUNAH TLAWH 

Rauthla Ni 4.10.2024 :  Vawiin khan Pu Cheemala Siva Gopal Reddy, IAS, District bawrhsap leh Chairman, District Level Committe on Pradhan Mantri Matsya Sampada Yojana (PMMSY)  nibawk chuan  PMMSY kaltlanga siam  Pu John Peter, Upper Saikah Sangha dil chu a hmunah kalin a thlawh.

Pu Cheemala Siva Gopal Reddy, IAS, chuan sawrkarlaipuiin sangha khawitute hmakhua ngaiin September ni 10, 2020 khan Pradhan Mantri Matsya Sampada Yojana (PMMSY) kalpui tanin, he Scheme- hnuaiah hiam hamthatna hrang hrang a awm a ni, a ti a. Sangha chi tha sem bakah quality tha  tam zawk tharchhuah te, man man zawka hralh, Sangha khawi lama tui mite tana  hna tam zawk leh rintlak zawk siam bakah sangha khawitute tana eizawnna tling siam chu a tum ber a nih thu a sawi.

Pu Cheemala Siva Gopal Reddy chuan PMMSY hnuaia tanpuina dawngtuten an dawng chhan ang taka taima leh tumruh taka hna an  thawh a tul hle a ti a. Sawrkar atanga tanpuina an hmuh ang angte chu hlawhtinpui ngei tura thawh a pawimawh thu a tarlang a ni. Pu John Peter sangha dil enkawl mek chungchangah Pu Cheemala Siva Gopa Reddy chuan lungawithlak  a tih thu sawiin, tha tak leh hlawhtlinpui ngei tura a thawhrimnaah malsawmna a dawn zel a beisei tih tarlangin duhsakna a hlan nghal bawk.

Pu John Peter hian kum 2010 atang khan sangha dil lo enkawl tan tawhin kum tinin sangha quintal-  6  vel a lo thar tawh thin a. Tunah hian PMMSY kaltlanga tanpuina a hmuh atangin sangha dil pakhat a enkawl mek a ni.

Pu Lalruatfela, District Fisheries Development Officer (DFDO)  Pu Dinesh Kumar Muhal, IAS,  SDC leh Pu Zonunchama Ralte, DIPRO ten Lawngtlai bawrhsap hi an tawiawm a ni. 

ZPM MDC PAHNIH IN COURT-AH THIAM CHANG.

"LADC-ah 'Kalphung thar, Mipui Sawrkar' a lo pianna tur kalkawng zel a ni."

 - ZPM Lai District Headquarters.

Rauthla 04.10.2024 : Kum 2020 MDC General election ah khan 16 - Lawngtlai AOC bialtu atan Pu LR. Dingliana Chinzah leh 21 - M. Kawnpui bialtu MDC atan Pu N. Zangura te chu Independent Candidate niin thlan tlin an ni a. LADC ah MNF party ten sawrkarna an siam khan tha takin an thlawp a ni. Nimahsela, party chhungah inthikna leh sawrkar ngêt a awm avangin MNF party an thlawpna chu an withdraw ta a. Tichuan, Dt. 20th June, 2024 ah ZPM party an zawm ta a ni. Hemi a nih avang hian Chairman LADC in MDC an nihna aṭanga ban (disqulify) a tumna leh, ban an nihlohna chhan tur insawifiah tura a tihna chu Guwahati High Court, Aizawl Bench-ah zualko a nih hnu in 'Status Quo' a ni a. Dt. 03rd October, 2024 hian Guwahati High Court Aizawl Bench chuan ZPM MDC pahnihte chuan MDC an nihna aṭanga ban an nihna chhan turah thiamlohna leh dan bawhchhiat engmah an neihloh thu sawiin, thiam a chan tir.

Independent MDC pahnih Pu LR. Dingliana Chinzah leh Pu N. Zangura te'n ZPM party an zawm avanga Chairman, LADC in MDC an nihna hlih a tum sak bakah hian - Pu K. Hre Kung, MDC chuan Kum 2023 November thlaah MNF party chhuahsan a, ZPM party a zawm avangin Chairman LADC chuan MDC a nihna aṭanga ban a nihlohna chhan tur insawifiah turin a lo ti tawh bawk a. Guwahati High Court Aizawl Bench chuan Dt. 12th June, 2024 khan Pu K. Hre Kung, MDC chuan MDC a nihna aṭanga ban a nih dan tur chungchangah dan bawhchhiat leh tihsual engmah a neilo tiin thiam a lo chan tir tawh bawk a ni.

LADC-a rorel mektu INC + MNF sawrkar inṭawmin lalna leh thuneihna an thlakhlelh luat avanga an mahni el pui leh an chunga lêng tur hnuh thlak tuma kawng hrang hranga hma an lak hnuah, Court leh dan hre mite kaltlanga Pathian hnathawh hi a ropui kan tiin, a thlamuanthlak em em a. LADC ah 'Kalphung thar, Mipui Sawrkar' lo pianna tur kalkawng ni ngeiin ZPM Lai District Headquarters Lawngtlai chuan kan ngai a ni.

Pu LR. Dingliana Chinzah, MDC & Secretary ZPM Legislature Party leh, Pu N. Zangura MDC & Member ZPM Legislature Party te kan lawmpui tak zet zet a. Ram leh mipui rawng an bawl zelna turah hlawhtlinna nasa zawk chang a, sâng tak thleng turin duhsakna kan hlan bawk e, tiin ZPM Lai District Hqrs chuan thuchhuah an siam 

 Kawng chhiat chhan hi chu sawrkar inthlahdah vang a ni ber - Er. K. Sawmvela

Rauthla 04.10.2024 :  Vawiin hian Mizo Hnam Runah chhung inkhawm neih a ni a. He hunah hian MNF General Secretary Er. K. Lalsawmvela, PWD Engineer-in-Chief hlui chuan thu sawiin, "Tuna kan kawng chhiat chhan chu sawrkar a inthlahdah vang a ni ber mai. Sawrkar hmasa atanga an chhawm sum thahnem tak a awm a, chu'ngte hmang chuan kawng an siam lo a ni," a ti.

PWD Engineer-in-Chief hlui chuan, "MNF sawrkar kal ta chhung khan kawng siamna leh enkawlnaah PWD Minister Pu Zoramthanga khan pawisa a pe tha em em a. Survey kan neihnaah Mizoram kawng kha Very good leh good-ah zaa 55%-65% a awm a. Mizoram PWD History-a kawng kan neih ṭhat lai ber a ni," a ti a. "Hetih lai hian MNF sawrkar tawp lamah Covid vangin hri avangin sum a lo harsaa kawng dinhmun pawh tlem chuan a hniam ve hret tih erawh phat theih a ni lo thung," a ti bawk.

MNF General Secretary chuan Press Conference a neih tuma a thusawi, ZPM Spokesman K Laltluangkima'n a chhanletnaah hriat sual leh sawi sual a nei nual tih a sawi a. "CM-in contractor duhsak takin, hlawkna tem ve a, chantlan duhna avangin, agreement dik lo ziaka PWD Officer a puh kha a dik lo tih ka sawi nawn leh duh a. Dan ang thlapin kha agreement kha ziah a ni," a ti a. "Tin, ZPM Spokesman-in Kawnpui - Khamrang contract agreement-ah EPC contract kalphunga la awm ngai lo a inzep nuala a sawi hi a vaiin a dik lo vek a, Covid len avanga harsatna tamtak awmin a nghawng denchhena Central in dan a siam danglam thenkhatte kha a hre tel ve lo a ni. A hriat kim loh ah huai takin a tawng hi a zialo hle a ni," a ti bawk.

Er. K Lalsawmvela chuan, "ZPM Spokesman hian mi thusawi a chhanletin sawrkar hnathawkte vauna lam hawi te, 'hetianga an awm leh chuan action kan la ang,' tih te, 'tute emaw chu hrut zeuh an ni ang' tih ang chi hi chhakchhuak fo lo se a duh a duhawm hle," a ti bawk.

 Rauthla 02.10.2024 : Vawiin October 2, 2024 @ 03:30pm velah khan Tv.K.Thado (Meipaw)  S/o B.Hlaute,  Tipa Dairy -II chu an lung lakna Quary chimin a delh a, ka pawh chhawn lo in ahmunah a boral.

K.Thado hi athawhpui Pu,Avala S/o R.Lalngura nena lung la a eizawng thin an ni a, vawiin lama lung lak chu an ban hnuah an hmanruate an senghawi laiin, an Quary chu rawn chimin lung leh leivungin a chhilh vek a.

Hetihlai hian a thian pa  Pu Avala chu an quary atanga kawngpuiah a chhuk hman chiah a. A thianpa chetsual thawm a hriat veleh quary lamah chuan a tlan chho vat a, a thian pa K.Thado lei leh lung chimin a khuh vek tawh chu, ala dam ringin a hai ta nghal a. Mahse, vanduai thlak takin a lo thi hman tih a hmuhin In lamah  Phone hmangin mi a pun a, mi tlawmngaiten a ruang hi an zu hlawm ta a ni.

He a chetsualna quary hi Tipa leh Saikao inkar ramri-lui piah, kawng chhaka awm a ni.

Vanduai na tawk ta, Tv K.Thado (Meipaw) hi a nu hmeithai leh a farnu enkawltu ber a ni a, mi taima leh tlawmngai tak, mi inngaitlawm tak a ni.

 MIZORAMIN THISEN PE THA CHAWIMAWINA A DAWNG

Rauthla 02.10.2024 : Mizoram chuan National Voluntary Blood Donation Day, October 1, 2024 khan India hmarchhak state zingah a thlawna thisen pek, voluntary blood donation-a ti tha ber lawmman Ministry of Health & Family Welfare leh National Blood Transfusion Council atangin a dawng.

October 1 kha National Voluntary Blood Donation Day a ni a, he ni pual hian sawrkar laipuia Ministry of Health & Family Welfare leh pawl dangte chuan Jaipur, Rajasthan-ah India Blood Donation NGO Conclave-ah an buatsaih.

Conclave-ah hian award \henkhat sem a ni a; hmarchhak state-a voluntary blood donation-a ti tha ber lawmman chu Mizoram hnenah hlan a ni a, Mizoram aiawhin Dr Vanlallawma Khiangte, Lunglei Civil Hospital-in a dawng.

Thisen pek leh lak chungchanga state-a thuneitu chu State Blood Transfusion Council a ni a, award-ah pawh hi Mizoram State Blood Transfusion Council hminga kaltir a ni. Award buatsaihtu hi Ministry of Health & Family Welfare leh National Blood Transfusion Council an ni. 

Rauthla 01.10.2024 : Vawiin khan khawvel huapa Upate Ni hman ani a, Pu.C.Hrangthianga Bialtu MDC & Adviser. MUP chuan hmanpui in thusawina a nei a, "Vawiin Ni a hun kan hman hi UN pawh in a ngaipawimawh em em a, December .14. 1990 khan UN General Assembly chuan 1st. October  hi, Upate Ni, ( International Day Of Older Person) atan a ruat a, a vawi khatna atan October . 01. 1991 ah hman tan ani. Mizoram ah pawh he hun hi hmang ve zelin, hun hmasa lamah chuan Mizo Upa pawl tiin vuah ani a, mahse chu chuan a huap zolo deuh nia hria in Mizoram Upa Pawl tiin 1993 khan thlak alo nita ani"..ati

"He pawl hi pawl zahawm tak ani a, a pawl hming vang mai nilo in, a chhunga awmte hi Upa tak tak in nih avang zawk hian he pawl hi a zahawmin a ropui ani. Vawiin a kan Upa te hi kan Ram leh khawtlang tan mi hlu in ni. tin, MUP  Motto, 'Mite tana malsawmna nih' tih  hi a ropui takzet bawk ani".ati

Adviser Pu.C.Hrangthianga chuan, "Tunlai khawvel hun danglam chak em em, thangthar nun hi intan a ninawm hle pawhin a rinawm tawh a, mahse heng thangthar te pawh hian, nunzemawi leh tha entawn tur in Upa te hi an mamawh che u a, Upa ten kawngdik leh tha kawhhmuh leh zirtir hi inkovah nghata a mawh inlak hi a pawimawh hle ani. Vawiin a kan Upa te hian mahni inkiltawih a, tangkaina neive tawhlo ang maia in dahhran na rilrupu mai lova, chhungkua leh khawtlang hian kanla mamawh em em che u a, inthlahrung hauh lova, in pawimawh na hria a che chhuak zel turin ka chah duh che u ani"..ati bawk..

"Vawiin Ni a kan Upa kalkhawm te inhlut em em na pakhat chu in fate'n Nu leh Pa tia koh tur an nei che u hi ani, Fate pawhin Nu leh Pa te ngaihhlut leh chawimawi nachang kan hriat deuh deuh hi a tul takzet a, kan khawtlang a Upa te hian Pathian malsawmna dawnga hriselna tha neia, rei tak dam turin duhsakna ka hlan che u ani".ati a.tin, Pu.C.Hrangthianga hian MUP te hnenah Rs. 10,000 a hlan bawk ani.

Pu. A. Lalropekthara VCP. College Veng chuan kalkhawmte chibai bukna a neih zawhin, thusawina a neizui a,  " MUP College Veng Branch te hian khawtlang ah Activity an neitha em em a, tin an tawngtaina hian khawtlang ah nasa takin hna a thawk ang tih hi a rin theih a, chuvang chuan an hnenah hian khawtlang aiawh pawhin lawmthu ka sawi ani",ati 

"Vawiin a MUP Day te hi Lawngtlai khawpui chungah pawh hmang theilo Branch thenkhat an awm maithei a, keini MUP College Veng Branch te chuan an Day alo thlen hian anla hmang thei zel a, heihian pawl chak leh nung tak ani tih a lantir ani", ati bawk.

Pu. A. Lalropekthara VCP. College Veng chuan, "Khawtlang leh kohhran ah pawh inthlahrung leh inkiltawih a bibo mai lovin, Upate hian tangkaina tamtak innei ani tih hretlat chungin, khawtlang inkaihhruaina leh enkawlna kawngah pawh Upa te hian min puihbawm a min finchhuah zel turin kan beisei tlat dawn che u ani", ati a,  MUP College Veng Branch te hnenah hian Rs. 2,000 Pu.A.Lalropekthara VCP, College Veng chuan a hlan bawk ani..

Khawvel huap Upate Ni a hun hmanna hi, Pu.Ng. Hrangkunga, Vice President MUP chuan kaihruaiin, mi thahnem tak kalkhawm ani. Pu.F.Lalchhuanawma Secretary MUP. College Veng Branch hnen atang Reports ngaihthlak ani. tin, Branch YLA College Veng, LWA , MHIP  hruaitute  chuan Mizoram Upa Pawl Day hmanna ah hian telpuiin, pawl aiawh a thusawina leh thilpek hlanna an nei nghal bawk ani..

ADVISER TO CHIEF MINISTER IN LAWNGTLAI DISTRICT SECONDARY SCHOOL SPORTS 2024 HAWNG

Rauthla 1st.October, 2024 : Vawiin khan 'Lawngtlai District Secondary School Sports 2024' hawnna inkhawm chu CYLA Playground, Chandmary Lawngtlaiah neih a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan khuallian niin a hawng. 

Dr. Lorrain Lalpekliana Chinzah chuan zirlaite tan hriselna tha a pawimawh hle tih hriaa infiamna hun tha tak buatsaih a ni chu lawmawm a tih thu  tarlangin, zirlai naupangten hlawk taka an hman theihna  turin 'Secondary School Sports 2024'  chu lawm taka  a hawng thu a sawi a. Hriselna leh thianghlimna kawngah Lawngtlai khawpuiin hmasawn a tul hle a, zirlai naupangte chu an  hriselna ngaihpawimawh piah lamah thianghlimna kawngah pawh theihtawp chhuah zel turin a chah.

Khuallian chuan zirlai naupangte chu ram leh hnam innghahna ber an nihna hre reng tura chahin, zirna kawngah theihtawp chhuah tur leh nakin lawka ram hruaitu tha tak ni ngei tura tun atanga rilru siam thar turin a fuih a. Thalaite khawvel a nihna angin, zirlaite pawh  vanglai an chen a thiang vek tih sawiin, Dr. Lorrain Lalpekliana Chinzah chuan mahni nun tichhe thei zawng a chen lo tur leh an hmalam thlir thiam tak chunga an nun hmang fimkhur turin a chah a. Thiamna tak tak neilo tan eizawnna ngelnghet neih a harsa  tawh hle  tih sawiin MLA chuan zirna kawngah hlawhtlinna chang ngei tura rilru puitling tak nena an zirlaite bei turin a fuih a ni.

Zirna kawnga hlawhtling tur chuan taihmakna leh tumruhna a pawimawh hle tih tarlangin Dr. Lorrain Lalpekliana Chinzah chuan taima taka zirlai zir tur leh hlawhchham chang pawh a tumruhna nen a beinawn fo thin turin a chah a. Hlawhtlinna hi vawi leh katah neih mai a har thin a, beidawng mai lo a rilru nget tak pu chunga beihnawn fo a tul hle a ti.  Secondary School Sports - a tel zirlai naupangte chu hlim taka hun hmang turin duhsakna a hlan tih  sawiin, sports zawhfel hunah theihtawp chhuaha an zirlai lama an rilru sawrbing leh turin a chah nghal bawk.

Lawngtlai District Secondary School Sports 2024- hi ni 1, October atanga ni 4, October, 2024  chhung neih tura ruahman niin, hemi chhung hian  Secondary School - ten infimna discipline hrang hrangah in elna an nei dawn a ni.