April 26, 2024 (Rauthla) : Nimin leh vawiin khan Lawngtlai District Students' Association leh District Legal Services Authority Lawngtlai tangkawp ten Lawngtlai District a Chawngte P leh Chawngte C a High School leh Higher Secondary School zirlaite pualin Legal Awareness campaign an buatsaih.
LDSA Founder Moses Lalvenhima kaihhruai Chawngte P Community Service Center-a nimina Legal Awareness Campaign neih hi session hnihah then niin, High School leh Higher Secondary School 9 atangin zirlai 600 vel in he program hi an chhim a. Vawiina session tawpna neiah naupang 200 velin program hi an chhim bawk a ni. Legal awareness campaign program hman chhung hian Chawngte P leh Chawngte C a NGO hrang hrang YMA, YLA, Chawngte P Thalai pawl, MHIP leh Central Young Chakma Association aiawh ten thu an sawi a. Chakma Autonomous District Council a Executive member, MDC leh CADC Chairman ten naupangte hnenah fuihna thu tha tak tak an sawi bawk a ni. He Program-ah hian zirlai naupang atangin, malzai bakah Mizo leh Chakma hnam lâm te entir a ni bawk. Resource Person hi Chief Judicial Magistrate leh Secretary DLSA ni bawk Pi.Jothansangi Tlau, MJS a ni.
Lawngtlai District Students' Association President Pu F. Lalkulhchungnunga leh Secretary Gabriel Zochhawna bakah, District Legal Services Authority, Lawngtlai te chuan Legal Awareness campaign Program ngai pawimawhtu, program chhimtute hnenah lawmthu an sawi a ni.
Post a Comment