April 26, 2024 (Rauthla) : Mizoram sorkara Agriculture Minister Pu Pc. Vanlalruata chuan LADC-a sorkarna a la awm thei lo chu Lairam mipuite an mangang hle tih a sawi a, Lairam mipuite thlamuan turin leh thil awm dan chingfel tura Lawngtlaiah an lo kal thu a sawi.
Vawiina ZPM Office, Lawngtlai Bazar-a Lawngtlaia thuthar thehdarhtute a kawmnaah Pu Pc. Vanlalruata chuan tunah hian LADC a MDC te chu sorkarna siam thei lovin 12-12 in an awm mek tih a sawi a, Sorkarna siamho turin MNF lam te pawh an kawm kual tawh thu sawiin, 'an rilru an sawhnghet riauin kan hria a, tunah hian sorkar tha din theih hmelin kan hmu lo a. Kan beidawng ang reng hle a ni' a ti. Tun hma sorkar lo neih tawh te, MNF leh Congress te anga a rem leh rem lo pawh sawi lova District Council namthluk mai duhna thinlung a lo awm tawh thin thu sawiin, mi tam tak in chutiang tur chuan ZPM te chu beisei tih sawiin, ZPM chuan hetiang thinlung hi an put ngai loh thu a sawi. Pu Pc. Vanlalruata chuan, ZPM Legislature party din chu an duhthusam nimahse, tul an tih loh thu leh, United Legislature Party din a, party dang nen pawh thawk a, MNF te pawh MNF an nihna bansan kher lovin, helaiah hian sorkarna tha tak din chu an duhdan a nih thu a sawi a. Hemi tihlawhtling tur hian an rilru an inhawng nasa viau niin a sawi.
Pu Pc. Vanlalruata chuan United Legislature Party din a, sorkarna tha tak din chu MNF MDC lam te rilru a ni hauh lo tih an hmu chhuak tih sawiin, pawi a tih thu a sawi a. Pathianin hun a tihah chuan helaiah hian sorkarna tha tak a din leh theih a beisei thu a sawi bawk. Tuna sorkar han thiah buai chu Lairam mipuite an lainat em avangin thleng lo hram se an duh tih sawiin, Pu Pc. Vanlalruata chuan 'amaherhawhchu, kan MNF unaute an inphahhniam thei ngang lo a nih chuan a la thleng lovang tih pawh a sawi theih loh' a ti.
Pu Pc. Vanlalruata chuan, Lairam mipuite dinhmun an hmuhin an lainat takzet tih a sawi a, sorkar tha siam thinglung puin an rawn fehchhuah thu sawiin, hetih lai hian an duhthusam ram chu an thleng mai dawnin a lang lo tih a sawi a, ZPM lam chu an inhawn reng thu a sawi bawk.
Adviser to CM Lalmuanpuia Punte chuan, tangrual sorkar siam thei ila, keimahni uapna hnuaia tuna MDC te hi awm se kan duh ber a. Kan sawmna an pawm theih loh chuan eng thil nge lo thleng dawn kan hre lova, ZPM chu a mawhphurtu kan ni dawn lova. Tha takin sorkarna siam puiah kan sawm a, an theih loh chuan dissolve emaw pawh thleng thei a ni a, an mawhah kan ngai a ni, a ti.
Lawngtlai East bialtu MDC leh Adviser to CM Dr. Lorrain Lalpekliana Chinzah chuan, ZPM Party chuan a tir atangin sorkar paihthlak duh leh tum tumna an neih ngai loh thu sawiin, MNF chhungkua atanga harsatna awma group pahnih an awm takah chuan group pakhatin ZPM te belin, an lo tlulut a. A party anga theih ang anga lo thlamuan hi kan tih tur a ni, a ti a. 'Party kan nih angin ZPM sorkar ding se tih hi kan duh a. Amahserawh chu kan tum ber a ni lova, united angin emaw coalition anga sorkarna tha, tute pawh leng sorkarna kan duh a ni, a ti a. Sorkar hi dissolve ni ta se, MDC tan te, ram tan pawh a tha lova, thlamuang taka mipuite an awm hi kan duh ber a. Vawiinia kan MDC te hi tlawmngaia kan Lairam tana sorkar tha tak din tur hian inlungrual lohna te harsatna an neih te paih bo a, pen chhuak turin ka sawm a ni, a ti.
Chanchin thar lakhawmtu
zawhna chhangin Pu Lalmuanpuia Punte chuan 'ULP kan din thei a nih chuan ZPM MDC
kan neih sa hi CEM nise kan duh dan a ni a, sorkarna a awm theih chuan hemi
chungchang hi sawikhawm leh a ni ang' a ti.
Post a Comment