Rauthla, December 09, 2021 : India rama sipai hotu lu ber General Bipin Rawat leh a nupui Madhulika Rawat te chu nimin December 8, 2021 a Army thlawhna Mi-17 V5 helicopter Tamil Nadu-a chesualah an tel a. He thlawhnaa chuang ve te zingah Air Force Group Captain Varun Singh tih loh mi 13 te chu an boral vek. Ani pawh hi a kang nasa hle.
General Rawat te hi Air Force base Sulur atangin chawhma dar 11:45 ah Coimbatore panin an thlawkchhuak a, Wellington, Nilgiri Hills-a Defence Services Staff College-a zirtirtu leh zirlaite hmaa thusawi tur a ni nghe nghe.
An kalna tur an thlen nan minute 10 chauh a awm tawh tihah, chawhnu dar 2 hma hlek khan Coonor bul lawk Tamil Nadu-ah an chesual a, a kang nasa hle. A tirah General Rawat hi damchhuak zingah a tel tih tarlan ni mahse a hliam a nat em avangin rei a daih ta bik lo a ni.
Kum 63 mi General Rawat hi India sawrkarin sipai chi hrang hrangte enkawl tura sipai hotu lu ber a ruat thar, Chief of Defence Staff hmasa ber niin January 2019 khan he hna hi a thawk tan a. Vanduaithlak takin VVIP ten zin veivah na’na an hman nasat tak, engine pahnih a neih avanga helicopter hima an ngaih Mi-17 V5 helicopter hmangin a chesual ta a ni.
Gen. Bipin Rawat te chetsualna hian India ram a dengchhuak rang hle. India mipui te an rum a, ram hruaitu te in be rawn nghal in Cabinet Meeting ko nghal a ni.
Post a Comment