Lawngtlai 13.09.2021 :Nimin khan Delhi Chief Minister Arvind Kejriwal chu Aam Aadmi Party (AAP) National Convener-ah thlan a ni a, vawithum a zawna thlan a nihna a ni. Nimina AAP National Executive inkhawm chuan an hotu berah Pu Kajriwal chu an pawm a ni.
April thla 2016 khan Pu Kajriwal chu AAP National Converner-ah thlan a ni a, vawihnihna a ni a, kum thum atan a ni. Mahse, kum 2019-a Lok Sabha election leh kum 2020-a Delhi Assembly thlanna avangin a hun chu kum 2020 thlenga pawhsei a ni.
Nikum-ah khan National Executive chu Covid-19 avangin an inkhawm thei lo a. Kumin January thlaa National Council inkhawm chuan an party Constitution an siamtha a, National Convener hun chu kum 3 atangin kum 5-ah an tisei a ni. National Convener atan mi pakhat term hnih thleng thlan theih tih pawh paih a ni.
AAP Constitution angin National Executive member 34 chuan National Convener thlan theihna an nei a. National Council chu inrinni khan an inkhawm a, chutah chuan National Executive member 34 chuan Pu Kajriwal National Convener atan thlanna an pawm a, nimin zing khan Pu Kajriwal chu National Executive inkhawm chuan National Convener atan an thlangnawn a ni.
Nimina National Executive inkhawmah chuan National Secretary leh National Treasurer tur an thlang bawk a, Pankaj Gupta chu National Secretary-ah an thlang a, ND Gupta chu National Treasurer, AAP-ah an thlang a ni.
Hetih lai hian AAP hruaitu senior Sanjay Singh chuan nakum maia Uttar Pradesh Assembly thlannaah seat awm zawng zawng 403 AAP chuana chuh dawn a ni a ti a. AAP chu ngaihnep mai tur a ni lo va, UP-ah chuan Congress aiin a chak zawk tawh a ni tih tun hnaia Panchayat thlannaah a lang a ni a ti. Nakuma UP thlanna turah eng party nen mah AAP chuan tangdun/ho tura inbiakna a nei lo tih a sawi. Sanjay Singh chuan tun hnaia UP-a Panchayat thlannaah AAP chu Panchayat 83-ah a chak a, vote nuai 40 chuang a hmu a, party candidate 1,600-in an chuh a ni a ti. Congress chuan seat 40 chauh an la a ni a ti.
AAP aiawha UP enkawltu Sanjay Singh chuan kum 2017 inthlanah UP Assembly 403 thlannaah Congress chaun seat 7 chauh a la a ni a ti
Post a Comment