May 14, 2024 (Rauthla) : Nimin leh vawiin khan Lawngtlaia cham mek Mizo National Youth Front, President Pu Robert Romawia Royte chuan Lawngtlaia Sports hmasawnna ruhrel siam mek te a tlawh.
Hachhek bialtu MLA leh Sport Minister hlui Pu Robert Romawia Royte hian nimin khan YLA Lawngtlai Vengpui Branch Field te, College Venga Lawngtlai District Residential Sports School te, Chawnhu Football Ground, Chawnhu Mini Sports Complex a tlawh bakah, tukin zing khan Mampuia Lawngtlai District Sports Complex sak mek a tlawh bawk.
YLA Lawngtlai Vengpui Branch Field a tlawhnaah hian Branch hruaitute chuan field sak hna a la kal mek thute, field sak mek la famkim lo te, siam zawh tawh sa tlabal tawhte thawm that leh a ngaih thu leh an hmalaknaa harsatna an neihte Pu Robert Romawia Royte hnenah hian an thlen a, Sport Minister hlui chuan a theih anga hma a lo lak pui tur thu a hrilh.
MNYF President Pu Robert Romawia Royte chuan Sport Minister a nih laia sorkar in infiamna lama hma a lo lak tawhte chu a enzui zel thin tih a sawi a. Hnathawh tha lo a awm a nih chuan a nihna ang taka thil a kal theih nan hmalak a tum thu a sawi a. Heng sports hmasawnna ruhrel thawk mekah hian hmasawnna chu a awm a, amaherawhchu sorkarin bill a pek that loh avangin hmun hrang hrangah hnathawh a chak lo tih a sawi.
MNYF President hi MNYF Dist. Hqrs., Lawngtlai hruaitute leh LDFA hruaitu ten an tawiawm a, Mampuia Lawngtlai District Sports Complex sak mek a tlawhah hian YLA Mampui Branch hruaitute, VC leh hnathawktu ten an lo dawngsawng a ni.
March 6, 2024 a Mizoram Assembly Session-ah Sport Minister Pu Lalnghinglova Hmar chuan Lawngtlai District Residential Sports School hi September 8, 2024 ah thawh zawh a nih tur thu a lo sawi tawh a ni.
Post a Comment