May 14, 2024 (Rauthla) : 11th Lai Autonomous District Council (LADC)-a Chief Executive Member (CEM) atana ruat thar Pu C. Lalmuanthanga chu vawiin khan LADC Hall, Lawngtlaiah Lawngtlai District Bawrhsap Pu Cheemala Siva Gopal Reddy chuan rinawmna thu tiamtirin a la lut.
CEM thar lak luh inkhawm hi LADC-a Executive Secretary Pu K. Lalthanzara'n a kaihruai a. LIKBK General Secretary Rev. B. Zazawna Lai chuan hunserh hmangin, hun kaihruaitu ES-in LADC (Constitution, Conduct of Business, etc.) Rules, 2010 rule 21 sub-rule (4) tlawh chhana LADC CEM atana Pu C. Lalmuanthanga ruatna sawrkar notification No. A. 43016/1/2020-DC&MA(L)/Pt Dt. 9th May, 2024 a chhiar chhuak a. Hemi hnu hian Lawngtlai Bawrhsap chuan CEM hi a la lut nghal.
Pu C. Lalmuanthanga, CEM chuan LADC-a sorkar thar siam tura MNF leh INC-in in a din United Legislature Party-a Leader atan an dah chu lawmawm a tih thu leh CEM dinhmun hial a luah thei chu Pathian malsawmna leh ULP a a thawhpuitute duhsakna a nih thu a sawi a. Ram danpui chhunga dik leh fel taka thil kalpuia a hun taka sorkar thar pawmpuina petu Mizoram Larsap chungah te, LADC sorkar thar pawmpuitu Mizoram Chief Minister Pu Lalduhoma chungah leh sorkar thar siam theih nana hmalatu zawng zawng chungah lawmthu a sawi.
CEM chuan LADC sorkar chu Lairam mipuite tan huapzo leh langtlang sorkar a ni dawn tih a sawi a, Central Sorkar leh State Sorkar atanga LADC in sum a dawn ang ang te dik leh langtlang taka hman an tum thu a sawi a. 'District Council chhunga sum leh pai tlemte te hi daihzai leh renchem taka hman kan tum dawn a. Chang tam bik awm lovin, "Sem sem dam dam ei bil thi thi” tih principle hmangin kalpui kan tum dawn a ni', a ti a. Lairam mipuite, kohhran leh tlawmngai pawlte leh chanchinbu mite chu ram hruainaah a ṭulna apiangah thurawn pe a, finchhuah ṭhin turin a sawm a ni.
CEM thar hian Deputy Leader atan Lungtian bialtu MDC, Pu Sanghuliana Mualchin a ruat thu a puang nghal a ni.
CEM lak luhnaah hian MLA pathum, Dr Lorrain Lalpekliana Chinzah, Pu C. Ngunlianchunga leh Pu Robert Romawia Royte te bakah, MDC-te, state leh LADC-a official-te, political party hruaitute, kohhran leh NGO hruaitute leh chanchinbu mite an tel.
Kumin March ni 7 khan LADC-a CEM ni lai Pu V. Zirsanga chuan CEM aṭanga banna theh lutin, LADC-ah sawrkarna siam tura legislature party majority nei thei an awm zui loh avangin Mizoram Governor chuan March ni 15, 2024 khan Lawngtlai Bawrhsap Pu Cheemala Siva Gopal Reddy chu LADC Caretaker atan a ruat a. May ni 1, 2024 khan MNF MDC 12 leh INC MDC 1 te'n United Legislature Party dinin, 6-Lungpher South MDC Constituency bialtu MDC Pu C. Lalmuanthanga, INC member kaihhruainaa sawrkar thar an din theih thu chu LADC Caretaker kal tlangin Mizoram Governor hnenah an thlen a. Hei hi Mizoram Governor chuan pawmpuiin, May ni 7, 2024 khan LADC CEM atan Pu C. Lalmuanthanga chu a ruat a. Hemi bawhzui hian vawiin khan CEM thar lak luhna chu buatsaih a ni ta a ni.
Post a Comment