Lawngtlai 15.Sept,2021 : Brazilian mixed martial arts star Vitor Belfort chuan round khatnaah technical knockout hmangin heavyweight world champion hlui Evander Holyfield a hneh a, commentator Donald Trump chuan 'Holyfield-a kha a ni tawh lo' a ti.
India hunah chawlhni zing khan Seminole Hard Rock Casino, Hollywood, Florida-ah an inhnek a, UFC Hall of Fame-a lakluh tawh kum 44 mi Belfort chuan hnek zawnin kum 58 mi Holyfield a tlu a, referee-in a chhiar chhungin tho leh mah se hnek chhuak ve lovin kuttum a tuar zui leh a, round hmasa ber a tawp hmain referee-in inhnek a titawp. Kum 1984 Olympic light heavyweight champion Holyfield chuan na a tuar loh thu sawiin a tlawm danah a lawm lo hle a, thutlukna chhe tak a ni, a ti.
Heavyweight boxing world champion ni thei zinga hriat hlawh tak American fighter Holyfield chuan professional zin kawng a zawh chhungin tum 44 hnehna changin mi 29 a knockout a, vawi 10 tlawmin tum hnih a inhnehtawk.
Kum 1996 leh 1997 khan Mike Tyson a hneh zawn a, hming a chherna lian ber niin kum 2011 khan Brian Nielsen a hneh a, heta tang hian tun hi hruihrual chhunga a inlan leh hmasak ber a ni a, chiang takin Belfort-a hmaah tlawm mah se Tyson nen a vawi thum nan inhnek a inpeih tih a sawi.
Holyfield leh Belfort inhnek tilartu ber pakhat chu US President hlui Trump a ni a, chanvo pawimawh neiin hruihrual sira commentatorah a tang a, boxer ropui Holyfield chu a danglam tawh a, an inhnek tan phat atangin a theihna tam tak a hloh tawh tih a lang a, Evander Holyfield kha a ni tawh lo, a ti.
Kum 75 mi Trump chuan inrinni khan New York tlawhin World Trade Centre-in beihna rapthlak tak a tawh kum 20-na pualin hun a hmang a, hemi hnu hian inhneka tel turin Florida venue-ah a kir a, mipuiin tha taka dawngsawngin an lawm hle a ni.
Post a Comment