Lawngtlai 30.July,2021 : Vawiin hi Thalai Kristian Pawl dincham vawi 70-na a ni a. Kum dangin hripui leng avangin Unit hrang hrang ten programme changtlung tak an hmang thei dawn lova. Nimahsela, he day pual hian Unit tin ten mahni Biak In ah Kum 70 tlin lawmna leh Pathian hnena lawmthu sawina dar Unit tiin vawi 70 theuh vuak nise an ti bawk a ni.
MTKP Secretary report hnuhnungber a tarlan danin MṬKP hian Pastor Bial 88-ah Unit ṬKP 420 awmin, member 44,228 awmin mipa 27,292 leh hmeichhia 16,936 an ni a. Kum 2020 chhung khan Kohhran dan puitlingin tuak 436 innei in, Dante in tuak 311 innei an awm bawk a ni. Tun dinhmun ah tak hian Pastor Bial inthen te an awm tak avangin Bial hi pun belh tura ngaih a ni.
Kum TKP Day thupui atan hian Tah Hla 3:40 'Lalpa lam I hawi ang u' tih chu hman a ni a. Kan Tunlai boruak nena thupui inhmeh tak a ni.
TKP Tobul leh TKP Day
Kum 1951, July ni 30 khan Serkawna Thalai thenkhat leh kohhran Hruaitu Upate chuan kan Zosap Missionary-te duhsakna leh kaihhruaina hnuaiah Thalai Kristian Pawl an din a. Hruaitu hmasate chu -
President : Pu R.Lungruala
Vice President : Pu Vanlalkunga
Secretary : K Lalliana
Treasurer : Pu T.Ropianga
Senior Adviser atan mi pali, Rev.HS.Luaia, Upa C.Saizawna, Zomawia Nu (Mrs.FJ.Rapers) leh Pu Lalmama te thlang chhuakin, heng bakah hian Executive Committee member 5 an awm a. Chungte chu, Nl. Rothuami, Pu Hrangthanga, Pu Lalsawma, Pu Remkunga leh Pu Thanghmuna te an ni. Thalai Pawl din hi Presbytery (tunah BCM Assembly kan ti) in a lo phal sa tawh avangin, Presbytery 1952 Inkhawmpui (Pukpui) rorelna chuan a pawmpui nghal ta bawk a. Tin, Biala din phalna pawh a pek nghal bawk avangin, Pastor Bial hrang hrangah din nghal zel a ni ta a ni.
Hetih lai hian Mizoram hi Assam State chhunga District pakhat mai a la nih avangin Zoram huapa TKP inkhaikhawmna pawh District TKP tih a ni a. District TKP inkhawmpui hmasa ber chu Pukpuiah kum 1955 khan neih a ni. Hun rei tak chhung chu TKP Day atan hian TKP Inkhawmpui hmasaber neih tuma a ni hmasa zawk October ni 22 chu hman a ni thin a.
Amaherawhchu he ni hi dik tawk lova hriatna a awm avangin MTKP rorelna in vawi hnih vawi thum a ngaihtuah nawn hnuah, kum 1995 MTKP Rorelna (Sethlun) chuan Kohhran hruaitute leh kan Missionaryte kaihhruaina hnuaia Serkawna TKP an din ni, July 30 hi TKP Day ah hman ni tawh se, a ti a. Chu chu BCM General Committee pawhin pawmpuiin kum 1997 atang chuan TKP Day hi July 30 ah hman a lo ni ta a ni.
 |
| MTKP President Rev.C.Vanlalmuankima |
Kumin hi TKP Day Vawi 70-na a ni a. Hri leng avangin TKP day kum danga an lo hman thin angin hman theih a ni lova. Tukin zing hian TKP Unit hrang hrang te'n mahni Biak In ah Dar Vawi 70 an vua ang a. Hemi hnu hian programme tawi hmangin, tawngtai rualna te hman a ni ang. Tin, MTKP buatsaihin zanin Dar 9:00 ah Zonet Zawlbuk, LPS 5 leh BCM & MTKP Youtube channel ah te TKP day programme hmanna tihchhuah ani bawk ang.
Post a Comment