Lawngtlai, July 30, 2021 : Vawiin Ni 30.07, 2021 hi Thalai Kristian Pawl dincham vawi 70-na a ni a. He hun hi TKP Nazareth Unit te chuan zingkarah hun an hmang a. MTKP Executive Committee in ruahmanna a siam angin, Jubilee Dar vawi 70 chu Unit TKP Office Bearers ten an vua a, hemi hnu hian inkhawmna hun tawi neih a ni.
He Hunah hian Rbt. Elvis Lalthangzuala'n hun hmangin TKP Day thupui 'Lalpa lamah I hawi ang u' tih thupui hmangin thutawi sawina a nei a. Tunlai kan boruak nena inmil tak thupui kan nei a. Kan hlimna leh phurna ringawt ngaihtuah a rawngbawlna kawng zawh lo ila. A rawng kan bawl sak hi a lung a awi ang em, tih kan ngaihtuah a hun tawh a ni, a ti a. Hri pui leng avangin harsatna tam tak kan tawk mek a. Tun harsatna kan tawk mek lai a, khawvel lam kan lo hawi anih chuan kan tisual ang. Chuvangin, heng hun harsa leh khirh tak kan tawn mek lai hian 'Lalpa i lam kan lo hawi mai zawk ani e,' kan ti zawk dawn lawm ni. Tun hun hi Lalpa lam kan hawi hun a ni a, tun hun zel ah hian kan Pathian lam hawiin amah nen leng dun turin rilru thar i pu ang u, tiin member te a sawm a ni.
Hemi hnu hian Pathian hnenah lawmthu sawina tawngrual neih a ni a. Inkhawmna hun tawi an neih hnu hian Village Level Task Force, Council Veng te hnenah tanpuina Rs. 5000 an hlan bawk a ni.
Post a Comment