Ramzotlang, July 29, 2021 : Nimin chawhnu dar 2:00 khan Baptist Covid Care Centre (BCCC), Ramzotlang, Serkawn a buatsaih chu BCM President Rev. Dr. V. Laldingliana’n a hawng.
Baptist Covid Care Centre hawnna hi Rev. Dr. C. Vanlaldika, AGS (Mission) in a kaihruai a, Upa Dr. Lalramzauva, Director, Medical & Health Department-in report pe-in, BCCC ah hian bul tan nan Doctor 1 leh Nurse 3 dah an nih tur thu leh khum 24 ruahman phawt a nih thu leh mamawh dan azira khum 35 thlenga dah belh theih a nih thu a sawi a, BCCC Office enkawltu tur 2 leh thawktu dang 6 dah an nih tur thu a sawi bawk.
Rev. F. Ramdinmawia, General Secretary pawh in thu sawi in, Baptist Covid Care Centre din a lo ni ta chu lawmthu sawiin, hemi atana phalna petu Mizoram Sorkar leh Lunglei DC te, a tul apianga thurawn pe-a, thawhpui inhuam Health & Family Welfare Department, Lunglei te chung ah lawmthu a sawi a. Kohhran, pawl (Fellowship Department) leh mi mal thanemngai te atanga BCCC din nana sum leh buangrua thawhtu zawng zawng chungah lawmthu a sawi bawk.
Rev. Dr. V. Laldingliana, BCM President-in BCCC hawnna a neih hnu-ah Rev. R. Lalbiakliana, AGS (Service)-in Pathian hnenah a hlan a, Rev. KV Thanga’n Malsawm tawngtaina-in programme a khar.
BCCC hawn ni hian damlo admit nghal a ni rih lo va. Thil tul leh pawimawh hrang hrang tihfel ngai la awm te tihfel a nih hnu-ah damlo admit theih a ni ang.
Post a Comment