Lawngtlai, December 02, 2021 : Vawiin December 2, 2021 khan Lai Autonomous District Council Thlasik thutkhawm ni hnihna leh sessin tawpna chu Chairman Pu VL. Hmuaka kaihhruaihna hnuaiah neih a ni.
Vawiin session-ah hian Vawmbuk bialtu MDC Pu T. Zakunga zawhna chhangin CEM Pu V. Zirsanga chuan, tun financial year 2021-2022 budget-a salary head hnuaia pawisa kan neih chuan thawktute hlawh a daih dawn lo a ti. CEM chuan December 2021 thleng a full-in hlawh sorkar hnathawk ten an lak theih dawn thu sawiin, January 2022 hlawh chu a full-in kan inpe thei dawn lo a ni a ti bawk. CEM chuan Chandmary Veng bialtu MDC Dr. Lorrain Lalpekliana Chinzah zawh belhna chhangin tunah hian Mizoram sorkarah RE dil mek a ni a, a bawhzui turin Aizawl lamah kal thuai tum a ni a ti bawk.
Transport Department changtu Pu BN. Thangpuia chuan Lungpher South bialtu MDC Pu C. Lalmuanthanga zawhna chhangin, Lawngtlai khawpuia chhunga motor parking area ni loah motor dah an tam thu sawiin, hei hian khawpui a tichep hle tih a sawi a. Kawng sira motor dah tam lutuk ti ziaawm turin DC lam leh Police lam te nen thawk dunin hmalak nghal a nih thu a sawi a, notice pawh chhuah thawh a nih thu a sawi bawk.
Pu C. Rongura, EM i/c LAD etc chuan Dr. Lorrain Lalpekliana Chinzah zawhna chhangin 15th Finance Commission hnuaiah Lawngtlai District-in 1st installment-ah cheng 302.01 a hmu tih a sawi a, LADC tan cheng nuai 187.19 a ni a, CADC tan cheng nuai 114.82 a ni. Pu C. Rongura chuan, LADC tana sum lo kalte hi VC hrang hrang 66 te kutah population base-a chhut hnuah pek a ni a ti a, VC 29 te chuan work order an lak loh avangin la pek an ni lo a ti bawk.
Tin, vawiin session-ah hian nimin session-a CEM Pu V. ZIrsanga'n Bill pathum a pharh zinga pakhat 'The Lai Autonomous District Council, Constitutions of Planning leh Development Board Bill 2021' tih chu lungrual taka pass a ni.
Tun tum LADC Winter Session-ah hian MDC hlui pahnih boral ta Pu Ukmang Zathang leh Pu VL. Dawma te sunna neih a ni a. Official bill pathum lut te pass vek niin, private member resolution pahnih lut zingah pakhat pass a ni a, starred question paruk a awm a, chhan kim vek a ni bawk.
Post a Comment