Lawngtlai, December 01, 2021 : Vawiin December 1, 2021 khan Pu VL Hmuaka, Chairman LADC kaihhruaina hnuaiah ni hnih awh tur Lai Autonomous District Council thlasik thutkhawm neih a ni.
Vawiin session-ah hian MDC hlui boral ta pahnih Pu Ukmang Zathang leh Pu VL Dawma te sunna hun hman a ni a. Pu Ukmang Zathang hi kum 1937 ah a piang a, kum 1970, PLRC hun laiin Sangau atangin MDC atan thlan tlin a ni a, hemi term hian EM a ni. Kum 1973 ah MDC atan thlan nawn leh a ni a, PADC a CEM hmasa ber ani. Kum 1983, 1992 leh 1997 ah MDC atan thlan tlin leh a ni a, hemi term hian CEM nihna a chelh leh a. Kum 2005 ah thlan tlin leh a ni a, Vice Chairman, Planing & Development nihna a chelh leh. May 23, 2021 khan chatuan ram a pan ta a ni.
Pu VL Dawma hi kum kum 2015 khan Lawngtlai Vengpui bial atangin MDC atan thlan tlin a ni a, August 18, 2021 khan ropuina ramah a chawl ta a ni.
Session tan a ni a, Pu T. Zakunga, Vawmbuk bialtu zawhna chhangin Transport changtu EM BN. Thangpuia chuan, tun LADC term-ah motor thar pasarih lei a ni a ti. LADC hian tunah hian motor 47 a nei mek a ni. Motor kim lo pakhat kim nia sawi chu Pu BN. Thangpuia chuan auction a ni a ti bawk. Taxation changtu EM C. Rongura'n Pu LR Dingliana Chinzah zawh belhna a chhannaah Entry of Goods Tax atangin LADC chuan kum kalta chhungin Rs. 328,460 a hmu tawh a, an target hi Rs. 71,540 in an la phak lo a ni.
Tin, vawiin session-ah hian Pu V. Zirsanga, CEM, LADC chuan bill pahnih - The Lai Autonomous District Council, Town Committee Amendment Bill, 2021 leh The Lai Autonomous District Council, Administration of Justice Amendment Bill, 2021 te chu a pharh a, bill te hi sawiho a nih hnuah pass vek a ni.
Tin, vawiin session-ah hian AOC Veng bialtu MDC Pu LR. Dingliana Chinzah private member resolution 'Lawngtlai Master Plan buatsaih ni rawh se LADC chuan a ti' tih chu lungrual taka pass a ni bawk.
Naktuk dar 10:30am ah session ni hnihna hi neih chhunzawm leh a ni ang.
Post a Comment