Lawngtlai, December 06, 2021 : Vawiin December 6, 2021 khan Sports & Youth Services Department, LADC Office-ah Mizoram State Boxing Championship Serchhipa neih zawh taka Lawngtlai District atanga Boxer kal hlawhtlinna changte chawimawina hun hman a ni.
Vawiin Lawngtlai Boxer-te chawimawina hi Pu Thathluna Chinzah, Sports & Youth Services Officer, LADC chuan a kaihruai a. He hun hmanpuitu Sports & Youth Services Department changtu EM Pu C. Hrangthianga chuan, 'Boxing discipline atang hian medal tam tak kan la chho mek zel a, sport discipline dang ai mah hian medal hi kan hawn tam thin a, kan boxer te ṭang ula, zuk leh hmuamah in sumin, hma lam pan zel ula, in tan ka awm reng a, in mamawh chu ka tih sak zel theih nan che u tan la ula' ti in a fuih a, Boxing hmangin Lawngtlai District chu chawinunga tihmingtha turin Boxer-te a chah bawk a ni.
November ni-30 atanga khelh tan D-3 Business Enterprise Mizoram State Boxing Championship Vawi 42-na, Serchhip khawpuia khelh zawh takah hian Lawngtlai District aiawhin Boxer-9 an fehchhuak a, heng zinga pariatte chuan medal an la a. Lawngtlai District aiawha fehchhuak Boxer te hian Gold-2; Silver-4 leh Bronze-2 an la a ni. Lawngtlai Boxer te hi Coach, TC Lalramchullova'n a ho a ni.
December Ni-2, Ningani-a Junior Men's final-ah Silver Lalropeka s/o Sapthawna, Lawngtlai Chandmary chuan Kg.63-67 huangah Elisa Lalthawhpuia, Mamit Boxer chu hnehin a champion a, Sub-Junior Kg.30-32 huangah K.Lalhruaitluanga s/o K. Lalfanthanga, Bazar Veng Lawngtlai chuan LH Vanneihtluanga, Lunglei Boxer chu hnehin a champion bawk a, K. Lalhruaitluanga hi Best Promising Boxer atan thlan zui a ni bawk.
Heng mite hian medal an la :
1. Silver Lalropeka S/o Sapthawna (63 to 67 kgs) - Gold
2.K.Lalhruiatluanga S/0 K. Lalfanthanga (30 to 32kgs) - Gold
3. Lalrinpuia S/o Vanlalpianga (45 to 48kgs) - Silver
4. Lalramthianghlima 30kg below s/o Vanlalkulha Silver
5. Samson Vanmangbika S/o James Lalngaihsaka (L) (32 to 34 kgs) - Bronze
6. Nicolas Lalmuanpuia S/o Jseph Mawizuala (52 54kgs) - Bronze
7. C. Lalnunthara S/o C.Venchhunga (48 to 54kgs Junior) - Silver
8. Lalkaisanga (57- 60kgs) - Silver
Lawngtlai Boxer te hruaitu SYS coach Tc. Lalramchullova chuan, he championship-a tel tur hian training an neih tlem thu a sawi a, training an neih chhun hun tlemteah erawh an theihna zawng zawng an hmang tih sawiin, heti chunga medal pariat lai an hawn thei chu hmasawnna a nih rualin an tumruhna rah a ni tih a sawi.
Post a Comment