Lawngtlai 06.Sept,2021 :August ni 24 atanga neih Tokyo-a Paralympics 2020 chu nimin khan zawh a ni ta a, India ram aiawhte chuan medal 19 an la. Chung zingah chuan gold medal 5 a tel a, kum 2016 Rio Paralympics-a India medal lak zawng zawng aiin tun tuma India aiawhte gold medal lak chu pakhatin a ram zawk a ni. A dangte chu silver medal 8 leh bronze medal 6 a ni. India aiawhin rualban lo infiammi 54 an tel a ni.
India aiawhte chu badminton, table tennis, archery leh shooting-ahte an tel a, Bhavina Patel bronze medal lain India medal lak hmasak ber a ni a, 'nikhata medal 5 lak ni pawh an nei a, an medal lak hnuhnun ber chu Krishna Nagar-an SH6 Badminton Men's Singles-a gold medal a lak chu a ni.
Medal 19-ah chuan shooters Avani Lekhara leh Singhraj Adhana te chuan medal pakhat aia tam an la a, Lekhara chuan Women's 10m Air Rifle SH1-ah gold medal a la a, Women’s 50m Rifle 3 Positions SH1-ah bronze medal a la bawk a ni.
Kum 39 mi, Singhraj chuan India Men’s 10m Air Pistol-ah bronze medal a la a, Mixed 50m Pistol-ah silver a la leh a ni. Rualbanlo infiammi 54 zingah 17 chuan medal an la a ni.
Pramod Bhagat chuan men’s single badminton (SL3 class) final-ah Great Britain Daniel Bethell hnehin gold medal a la. Inrinni khan Bhagat chuan 21-14, 21-17-in a hneh a, India chuan gold medal 4 a lakna a ni. World No. 1 ni mek Pramod Bhagat chuan semi final-ah 21-11 21-16-in Japan Daisuke Fujihara chu minute 36 chhungin a hneh a ni. Indian shuttler Krishna Nagar pawhin gold medal lain Men’s singles SH6 finalah No.2 seed Chu Man Kai 21-17, 16-21, 21-17-in minute 43 chhungin a hneh a ni.
Langsar tak pakhat chu Noda District Magistrate ni mek, Suhas L Yathiraj chuan men’s singles SL4 finalah France Lucas Mazur 21-15, 17-21,15-21-a hneh lovin silver medal a la a ni. Kum 19 mi, Manish Narwal chuan Mixed 50m Pistol Shootingah gld medal a la a,point 218.9 a score a ni.
India chu a pumpui-ah 24-na niin China an ti tha ber thung a ni.
Post a Comment