Lawngtlai 06.Sept,2021 : West Bengal-a BJP MLA Soumen Roy chuan he state-a rorel lai Trinamool Congress a zawm a, Kumin May thlaa West Bengal Assembly thlanna result puan hnua West Bengal-a BJP MLA zinga TMC zawmtu palina a ni.Soumen Roy chu Kaliagnaj bial MLA a ni.
Chawlhkar khat chhungin BJP MLA pathum chuan TMC an zawm a, A hmain Bagda bial MLA Biswajit Sas leh Bishnupui bial MLA Tanmor Ghosh te chuan TMC an lo zawm tawh a ni.
Soumen Roy chuan kum hnih kal ta khan TMC atangin BJP a zawm a, BJP a lo zawm pawi a tih thu a sawi. TMC chu TMC Secretary General Partha Chatterjee hnenah a zawm a ni. Eng emaw inhriatthiam lohna avanga TMC chhuahsan a ni a, BJP-ah nuam nuam a ti lo a, Chief Minister Mamata Banerjee hmasawnna hna thawhnaah a tel ve duh a ni a ti.
“Ka taksa-in BJP ka zawm a, ka rilru leh ka thlarau chu TMC-ah a awm reng a, BJP ideolofy te chu ka pawm ve lo a, an inthendarh politics (divisive politics) chu ka pawm lo a, kan state hi sakhua, tawng, hnam leh thurin hmangtea tendarh an tum a, chu chu ka duh lo a ni” a ti. “Tunah hian mahni inah ka hawng leh ta a ni” a ti. TMC-ah lawmlutin Partha Chatterjee chuan “BJP chuan inthlannaa nasa taka an chak lohna phuba TMC laka lak an tum a, mahse, politically-in kan beilet dawn a, West Bengal mipui teitet an tum a, mahse, state mipui chuan an loterate dawn lo” a ti. June thla khan BJP MLA leh BJP National Vice President Mukul Roy chuan kum 4 kal taa TMC chhuahsana BJP zawmtu chuan TMC a zawmleh a ni.
Tichuan West Bengal Assembly member 292 awmnaah chuan MLA 77 neitu BJP chuan May thlaah khan 75 an nei a, an MLA pahnih Nitish Pramanik leh Jagganath Sarkar chuan Lok Sabha MP nih an duh zawk a, an bang a. MLA 4 an bang leh a, 71 an ni ta a ni. MLA 4 chu officially-a an ban a ngai a, tunah chuan BJP MLA an la ni tho. TMC chuan inthlannaah khan MLA 213 an nei a, an tanpui ISF leh GJM chuan MLA 1 ve ve an nei a ni.
Post a Comment