MILKHA SINGH - 'THE FLYING SIKH' A AWM TA LO
Tunge 'Flying Sikh' tih kha naupan lai ațangin GK zawhna kan hriat țhan êm êm a ni. India rama awm te tan Milkha Singh hriat chu rual pawlna a ni a, amah hriat kha tihmakmawh a nihna chen pawh a awm ang, zawhnaah a chhuak zing tlat! Mahse, harsatna leh hrehawm tam tak chhel taka lo paltlang tawhtu chu Covid hrik te reuhte ngam lovin a zin kawng a lo tawp ve ta.
Kum 1958 Commonnwealth Games-a gold medal a lak țum kha India infiammi te'n Commonwealth Games-a gold medal an lak hmasak ber a ni a. Prime Minister Nehru-a'n a duh ber dil turin a ti a, India rama a let leh ni chu, National Holiday a puan a duh ber thu a thlen a, Nehru chuan a dilna a tihhlawhtlinsak a. Mihring dam lai puala ram pum huapa chawlh puan tawh tlemte zinga mi a ni awm e.
Kum 1960 Indo-Pak sports meet a tel turin Nehru-a'n a ngen a, phur vak lo chungin a kal a. Pakistan lamah an tlan chak chhuanvawr Asian record pawh siam tawh Abdul Khaliq a awm ve bawk a. An intlansiak dawn chuan Muslim puithiam hovin Khaliq chu țawngțaiin mal an sawm a. Milkha Singh lungawi lo chuan, 'Pathian fate vek kan ni lawm ni, mal min sawm ve rawh u' tiin a țawngkhum hmiah mai a, phur vak lovin mal an sawm ve ta a. An intlansiak a, Milkha Singh chu a chak ber a. Chumi țum chuan Pakistan ram hruaitu hriat lar tak President General Ayub Khan-a khan a en ve a, 'Milkha Singh chu a thlawk a ni ber alawm', a ti a, heta țang hian 'Flying Sikh' tih hming hi a pu hlen ta a ni.
India ram tana hlawhtlinna a chan kum 40 zet hnuah kum 2001 khan BJP sorkarin infiammi chawimawina sang ber Arjuna Award pek a tum a. Arjuna Award la tur hming chhawpchhuah ho a'n en chuan Kabaddi player tihvel te an lo awm nawk mai a. A lungawi lo chuan khatih laia Union Sports Minister Uma Bharti hnenah award lak phu lova a hriatte hming a hrilh hmiah mai a. Infiammi te chawimawina zahawm tak chu tute emaw duhsak zawng pek mai mai tur niin a hre lo a, chung ho nena bawm khata awm chu duh lovin Award pawh chu a hnar fithla țhak a ni. A țhatlai hunin India ram sports hmasawn nan a thawk nasa a, infiammi țha tak tak a chher chhuak a. A fate pawh a chher chhuak țha a, a fapa golfer Jeev Milkha Singh chu Arjuna Award leh Padma Shree hlan tawh a ni nghe nghe a ni. A chanchin ngaihnawm sawi tur a tam a, tunah chuan The Flying Sikh chu a thlawk tak tak ta!
RECORDS & HONOUR
1958 Asean Games Tokyo Japan :
GOLD - 200 M
GOLD - 400 M
1958 Commonwealth Games, Cardiff Wales
GOLD : 400 M ( 46.6 seconds)
1962 Asean Games Jakarta, Indonesia
GOLD - 400 M
GOLD - 4X400 Relay
1959 : Padma Shri
Post a Comment