Lawngtlai 8th June 2021: Covid-19 hripui leng laka inven nan Hand Sanitizer khawvel hmun tinah a lar thar hle a. Hand Sanitizer chi hrang hrang a tam avangin mitin fimkhur theih nan Mizoram FDA chuan hetiang hian fimkhurna thuchhuah a siam :-

1. World Health Organisation (WHO) chuan Alcohol-Based Handrub (ABHR) hi SARS-CoV-2 atan hman tha a ti (recommend) a. International Research Team-in WHO formulation hi zirchiangin Covid-19 laka inven nana hmantlak a ni tih a nemnghet bawk.

WHO formulation hi chi hnih a awm a, hetiangin:-

Formulation - 1

     Ethyl Alcohol             - 80% v/v

     Glycerol                      - 1.45% v/v

     Hydrogen peroxide- 0.125% v/v

Formulation - 2

     Isopropyl Alcohol    - 75% v/v

     Glycerol                       - 1.45% v/v

     Hydrogen peroxide- 0.125% v/v

2. Central Sorkarin Hand Sanitizer hnianghnara a awm theih nan damdawi siamtu company-te hand sanitizer siamchhuak tam turin a fuih reng a. A siam leh zawrhchhuah lamah pawh dan dinglai hun engemaw chen atan thlahdul a ni a. Sanitizer siam pawh ram chhungah a tam phah em em a ni. 

3. Sanitizer siamchhuah leh zawrh chungchanga Central-in dan a thlahdul hret hian misualte tan chetna remchang a siam a. Hand Sanitizer tha lo (Sub-standard/ Spurious) leng vel ram chhungah a tam phah ta hle tih hmuh a ni.

4. Natna hrik chi hrang hrang a awm angin chumi laka inven nana Hand Sanitizer chi hrang hrang a awm hi thil dik lo a ni ngawt lo va. Amaherawhchu, Covid-19 hrileng kara awm kan nih avang hian eng Sanitizer nge kan thlan ang tih hi a pawimawh lai tak chu a ni. Coronavirus laka vawnghim zo lo Sanitizer kan thlang a nih chuan thil pawi tak a thleng thei a ni.

5. Covid-19 hri leng laka kut tihfai nan (tui leh sahbawn a silfai a remchan loh chuan) Alcohol-based Hand Sanitizer chauh hman tur a ni. Lei dawnin a label ngun tak a en in, alcohol content a sang tha tawk em tih te, manufacturing date leh expiry date-te chik zel tur a ni a. Damdawi siamtu ziktluak siam chhuahah spelling dik lo a awm ngai lo va. Chutiang hmuh a nih chuan lei loh a him ber ang.

6. Phai lam atanga a hlawma chah chhuak thinten Manufacturer/Distributor ziktluak hnen atang chauhva lak tur a ni a, GST Invoice nen thlap a ni tur a ni. Chutiang bawkin mahni hman tura leite pawhin cash memo lak zel tur a ni