June 20, 2024 (Rauthla) : Vawiin khan Lai Autonomous District Council a MDC pakuate chu Pu W. Chhuanawma MLA, ZPM Gen Hqrs. a Vice President chuan ZPM party-ah a lawmlut.
LADC Hall, Lawngtlaia MDClLawmluhna inkhawm neih hi Pu H. Lungrualkima, Treasurer ZPM Lai District Hqrs. chuan kaihruaiin, Pu W. Chhuanawma chuan LADC ah sorkarna siam thei an awm mumal loh lai khan ZPM chuan State a rorel lai an nih angin LADC ah Sorkarna siam turin hma a la lo tih sawiin, Autonomous District Council zahawmna hum him chu ZPM in a duh vangin Party dang ten an Sorkar laia Autonomous District Council a an Party sorkar tir phet an tum thin ang khan ZPM chuan tha a ti ve lo, a ti a. MDC pakua laiin ZPM ah rinna nghata an zawm ta chu lawmawm a tih thu sawiin, ZPM chuan Party ah an lawm luh ngai loh thu leh an Policy tawmpuitute chu Policy ah an lawmlut thin tih a sawi bawk.
Lai Autonomous District Council a MDC nilai pakua ZPM zawmtute hi kumin April ni 4 a MNF Party chhuahsantute MDC pasarih, Pu Manghmunga Chinzah, Pu T. Lalengmuana, Pu V. Zathanga, Pu BN Thangpuia, Pu Tuturu Singh, Pu L. Lalhmachhuana leh Pu C. Lianzuala te bakah Independent MDC pahnih Pu N. Zangura leh Pu L.R. Dingliana Chinzah te an ni.
Elected Member 25 nei thei Lai Autonomous District Council ah hian Lawngtlai Chandmary bialah by election neih tur niin, tun dinhmun ah Elected Member 24 awmin, Congress Member pakhat leh MNF Member 12 ten Congress Member CEM kaihhruaina hnuaiah an sorkar mek a, vawiina MDC pakua ZPM zawmte bakah hian ZPM chuan MDC pakhat a lo neih sa nen MDC 10 neiin, BJP, MDC pakhat awm bawkin eptu lam ah MDC 11 an awm mek.
MDC pakua, lawmluhna inkhawmah hian Lawngtlai East bialtu MLA, Adviser to Chief Minister Dr. Lorrain Lalpekliana Chinzah, Pu MC Lalramchhana. President ZPM Lai Dist. Hqrs bakah, lawmluhte atangin thusawi ngaihthlak a ni.
Post a Comment