June 13, 2024 (Rauthla) : Vawiin khan LADC Hall-ah Thahleimawii (Amawii) lehkhabu ziah 'Chhimbal zungkaihna ramah' tih chu Lawngtlai District MJA President Pu Elvis Lalthangzuala'n a tlangzarh.
Pu Elvis Lalthangzuala chuan lehkhabu ziah chu thil harsa tak a nih thu leh, lehkhabu ziak tur chuan taimakna, thawhrimna leh teirei peih a ngaih thu a sawi a. Kan ram, kan hnam chu Literature ah kan la hniam thu leh hmasawn kan ngaih thu sawiin, Thu leh hlaa hma kan sawn loh chuan kan khawtlang nun hian a tha lo zawngin nghawng a nei ang tih a hlauhawm hle a. Chuvangin, kan khawtlang nun tha lo leh fuh lo nia kan hriat te pawh hi thu leh hla hmanga a tha zawnga khalh ngil dan kan ngaihtuah pawh a hun tawh hle a ni, a ti a. Literature hmang hian kan hnam nun leh kalphung humhina kawngah hma kan la thei a ni, a ti bawk.
Tunlai thangtharte nunah Electronic Media in bu a khuar nasa hle tawh mai. Kan thuziak tha tak tak pawh kan pholang nasa hle bawk. Mahse, hei aia tangkai zawk Print Media chul lo tur hi kan ngaihven a, lehkhabu khawrpum thei tur a tan kan lak thar pawh a tha hle mai. Ziaka thil dah that kan uar chhoh loh chuan kan hnam hian boralna kawng a zawh mek tih kan rilruah kan vawn reng a ngai, a ti a. Kum naupangte ni chunga Amawii'n lehkhabu tha tak a tichhuak thei chu a lawmawm a tih thu a sawi a, a taihmakna leh thawhrimna hi thalaite hian kan entawn tur a ni, a ti bawk.
LADC Hall-a Amawii lehkhabu tlangzarh hun hi Lucy Bawitlung in kaihruaiin, Pu CT. Lalzawmliana'n hunserh hmangin, Dennis Lamalsawma'n lehkhabu thlirlawkna neiin, BCM Bethel, TKP Bethel Unit, YLA Bethel Veng Branch, LWA Bethel Veng Branch, MHIP Bethel Veng Branch, South Heath Academy leh PPA ten thutawi an sawi a. Ruthi Lalvenhimi'n zaiin kalkhawmte a awi bawk.
Lehkhabu ziaktu Thahleimawii (Amawii) chuan tunlai thalai ten lehkhabu chhiar kan peih tawh loh thu sawiin, lehkha ziak leh chhiar kawngah tan lak kan ngaih thu a sawi a. Amawii chuan, lehkhabu ka ziah chhan ber chu beiseina a ni a. Beiseina kan neih loh chuan nikhat pawh kan dam thei lova. Hmalam kan pan theihna chhan hi beiseina niin, tlu tawh te, hmalam pan thei tawh lo te min nawr kaltu chu beiseina hi a ni. Beiseina nei theuh turin ka sawm a che u, a ti a. A lehkhabu a puitlinna tura amah tanpuitu leh tha thawhtu zawng zawng chungah lawmthu a sawi bawk.
Thahleimawii hi Chapchar Kut Miss 2024 niin, IGNOU ah BA a zir mek a, Bethel Veng Lawngtlaiah chhungkuain an cheng mek a ni.
Chhimbal zungkaihna ramah tih hi phek 148 a chhah a ni a, Rs. 180 man a ni.
Post a Comment