June 10, 2024 (Rauthla) : ZPM Lai District Headquarters Lawngtlai President Pu MC. Lalramchhana chuan "Ram leh khawtlang hruaitu ṭha, mi rethei leh pachhiate tana ding ngam tur ZPM VC khawtinah neih kan tum a ni." a ti.
ZPM Lai District Headquarters Lawngtlai chuan vawiin khan an party office-ah party chhung inkhawm leh VC inthlan lo awm tura ZPM ticket-a ding turte puanna hun an hmang a. Pu MC. Lalramchhana chuan, ZPM Village Council candidate te chu dik tak leh rinawm taka kal turin a chah a. VC te chu mipui rawngbawl tur an nih avangin, tun aṭanga taima tak leh thahnemngai taka hma la turin a fuih a. Party leh Unit-te thawhpui thiam turin leh, mahni aia midangte ngaipawimawh a, harsa zawkte tana ding fo turin a chah bawk.
Vawiin chawhnu dar 1:30 pm khan LADC Village Council General Election lo awm tura ZPM VC candidate (VC ticket) turte puan niin, a thawh khat nan Lawngtlai West a khaw 46 ZPM VC ticket puan hmasak an ni a, naktuk, Dt. 11th June, 2024 (Thawhlehni) ah ZPM VC candidate turte hi puan chhunzawm leh tum a ni.
Chhung inkhawm programme hi Pu St. Laldailova ex-MDC chuan a kaihruai a. ZPM Lai District Headquarters Elected OBs, Pu K. Hre Kung MDC, Pu CL. Lianzuala MDC te leh, party mi ṭhahnemtak an kalkhawm a ni.
Hunserh hmangtu Rev. H. Lalsangvunga chuan, Pathian rawngbawlna kawng hrang hrang zingah politics chu rawngbawlna hmanraw pawimawh berte zinga mi a ni, a ti a. ZPM party mite chu party dangte aia danglam tur leh, dik taka hma la fo ṭhin turin a chah bawk a ni.
Post a Comment