June 10, 2024 (Rauthla) : Vawiin khan Lai Women Association General Hqrs, Lawngtlai chuan kumin 2024 HSSLC result chhuak a Lawngtlai District atanga Top 10 a lang te pualin LWA Office, Electric Veng Lawngtlaiah hun hmangin, chawimawina thuziak an hlan.
He hunah hian Pu C. Lalmuanthanga, Lai Autonomous District Council-a Chief Executive Member chu khuallian niin, tunlai thangtharte zingah Lai tawng thiam lo kan la tam hle mai a. Kan duh avanga Lai hnam a awm kan ni ngawt lova, Pathianin hnamah min din a, a duh taka siam hnam kan ni tih hria a, kan hnam tawng hi thangtharte hian kan uar zual sauh sauh a ngai ani, a ti a. Zirlaite pawhin mahni hnam bo san lova, kan thiamna leh finna te ram leh hnam hmasawnna atan tangkai taka kan hman a hun tawh ani, a ti.
Khuallian chuan, kan ram hi chhan tlak a la awm a. Chumi tur chuan kan tanrual a, rilru dang pu lova lungrual taka ke pen a, thawhhona tha tak nen kan ram hi kan enkawl a hun ta. Chutiang tur chuan chhungkua atanga bul kan tan a ngai a, chhungkua a him loh chuan kan ram hmabak chu a thim hle. Chu hun chu a thlen lohna turin Nu te hian in pawimawhna hria a, chhungkua in awplum thiam a tul hle a ni, tiin LWA member te a chah bawk a ni.
Lai Women Association ten chawimawina an hlan tak zirlaite chu tum mumal tak nei a, kan tum ram kan thlenna tur kawngah rim taka kan thawh a ngai a ni, a ti a. Tum mumal nei lova zirna kan chhunzawm a nih chuan kan hlawhtlinna hian awmzia a nei dawn lova. Kan thil tum chu kan nun min kaihruaitu ah hmang ila, kan tumah chiang bawk ila, kan ngaihtuahna leh suangtuahna a lo hlawhtlin theihna tur chuan rim taka thawk a, tak la zel turin a chah bawk a ni.
Vawiina lawmpuina an hlan te hi Suchismita Ghosh D/o Santanu Ghosh, Lawngtlai-III (5th Position Arts), F. Lalneihpuii D/o Lallawmsanga, Lawngtlai-III (6th position Arts- Topper in Geography) leh Elizabeth Lalthanpuii D/o Rev. V. Suikharliana, Lawngtlai Chandmary (9th position Arts) te an ni a. Heng hlawhtlinna chang lawmpuina an hlan te hi thuziak leh Rs. 1,000 theuh an hlan a ni.
Post a Comment