June 10, 2024 (Rauthla) : Vawiin khan LADC Hall-ah Lawngtlai District Students' Association leh Lawngtlai West MLA te tangho in, Lawngtlai West Assembly Constituency chhunga zirlai tithate chawimawina hun hmangin, he hunah hian Lawngtlai West atanga kumin a HSLC leh HSSLC Distinction a pass chin zirlai 21 hnenah chawimawina thuziak an hlan.
He hun hi Pu C. Lalmuanthanga, CEM LADC chuan khuallian ni in a hmanpui a, Pi Margaret J. Vanlalremmawii SDO (Sadar) chu khual zahawm a ni bawk. Khuallian chuan zirlai naupangte fuihna thu sawiin, khual zahawm Pi Margaret J.Vanlalremmawii’n Motivational Speech sawiin hun a hmang bawk a ni. An ni bakah hian LDSA President Pu F. Lalkulhchungnunga leh he program a tel school Principal ten thusawina hun an hmang bawk.
He Programme ah hian Lawngtlai khaw chhung school atangin zirlai 100 chuang an tel a, program hmangtu hi an zavaiin mi 150 chuang an ni. Mizo zaithiam lar Latei Hringen chuan he program a kalkhawmte hi zaiin a awi bawk a ni.
LDSA Secretary Pu Gabriel Zochhawna chuan naupangte an hlan tur citation siamna atana phal taka sum leh pai thawhtu Lawngtlai West Bialtu MLA Pu C. Ngunlianchunga chungah LDSA hmingin lawmthu a sawi a, Khuallian Pu C.Lalmuanthanga CEM LADC pawhin refreshment man leh senso tul dang a tumsak avangin a chungah lawmthu a sawi bawk.
Post a Comment