May 1, 2024 (Rauthla) : Nimin khan Lai District a tlawmngai pawl lian ber YLA kum 50 tlinna Golden Jubilee kumin 2024 chhunga lawmna neih tur hawnna inkhawm Lawngtlai Areopagy ah neih a ni a. YLA Golden Jubilee hawnna inkhawm Areopagy a neih ah hian Central YLA President Pu HC.Vanlalruatpuia’n kumin 2024 chhunga YLA Golden Jubilee lawmna, tlang hrang hranga YLA Member ten hlim taka an hmanna turin a hawng.
He hun telpuitu, Central YLA President lo ni tawh Pu H. Zothangliana chuan Aia Upa zah chu YLA member ten chawi nun thar leh a tul thu a sawi a, Zirna kawngah tun aia nasa zawk a thalaite ke pen tura chah bawkin, kan ram zimte a Ramngaw leh Lui leh nungchate chu humhalh an ngai takzet tawh tih a sawi bawk a, hemi atana YLA Member zawng zawngte thahnemngai turin a sawm bawk. Pu H. Zothangliana chuan LADC Sawrkar chungchang sawilang bawkin, LADC hlutna leh humhim hi kan ram leilung fate hian kan tihtur a ni tih sawiin, ‘tuna YLA Memberte hi nakin lawka kan ram hruaitu turte in nih avangin, kaihhruai tlak ram din turin tan kan lak a ngai a, Rorelna fel leh midangte Rorelna tha hnutchhiah turin tuna thuneitute pawh ka ngen bawk a ni’ ati a. YLA chuan kan ramah thiltha tamtak a tiin, a sual chhuak tawh a, ram hmasawnna atan hma ila zel ang u, a ti bawk.
Pu Joseph Lalhmingthanga Chinzah, General Secretary tarlan danin, YLA chu September 23, 1974 a din niin, tun dinhmunah YLA chuan Sub-Hqrs 7 leh Branch 116 nei mekin, YLA Member hi 55760 an awm mek.
He hunah hian Central YLA Hruaitu lo ni tawh te thahnem tak an tel thei a, Branch hrang hrang atangin Items thlir leh ngaihthlak a ni a, Pu T. Rohlupuia, Fin. Secretary. CYLA chuan lawmthu sawiin hun a khar ani.
YLA Golden Jubilee hi kumin kum tluana lawm tum a ni a, May thla chawhnu lam atangin Inter Branch Football Tournament neih a ni dawn a. October thlaah Branch Zaipawl leh Hnam lam intihsiakna neih ani bawk ang a, September ni 23 ah Branch zawng zawngin Jubilee lawmna neih tur a ruahman ni bawkin, November thlaah hian Ni 3 chhung Jubilee lawmna pui ber Lawngtlai ah neih a ni dawn bawk a ni.
Post a Comment