May 30, 2024 : Positive Women Network Mizoram (PWNM)-te chuan vawiin chhun khan Mission Veng Presbyterian Kohhran Hall-an International AIDS Candlelight Memorial Service, 2024 pualin hun an hmang a, an hun hmanpuitu Chief Minister Lalduhoma chuan Mizoramah AIDS vangin mi 5,021 an thih tawh thu a sawi.
Chief Minister chuan, MSACS lam ten ART data an lakkhawm danin AIDS natna hi mi 24,864-ten Mizoramah an kai tawh a, an zinga mi 5,021 in min boralsan tawh tih sawiin, 'Tuna he natna tuar mek kan thiante zingah hian tam takin ART tha taka an lak laiin a, la rih lo hi kan la nei nual mai. Chhui zui hleih theih lohva awm pawh an awm. ART Centre hi Mizoramah 14 kan nei mek a, district hospital zawng zawng bakah ZMC, Kulikawn Hospital leh Durtlang Hospital-ah te kan nei. Heng kan Centre te hi thenkhat tan chuan a lo hla deuh hlek pawh a ni thei a, mahse ART lak ngei hi he natna enkawl nana thil tha ber anih avangin natna tuar mek kan thian te hian lo pan hram se kan duh ber a ni,' a ti.
Candlelight Memorial Service hi HIV/AIDS vanga mual min liamsan tawhte kan hriatrengna leh he natna a darh zel lohna tura thawktute chawimawina nih thu sawiin Lalduhoma chuan, 'Bati hi chu midangten enna an hmuh theih nan a inchhi ral thin. Keini pawh bati ang hian midangten malsawmna an dawn theih nan kan inchhi ral ve ang a, he natna lak ata mite an lo him theih nan leh a lo kai palhte pawhin enkawlna tha an dawn theih nan i bei zel ang u,' tiin PWNM-te chu an rawngbawl zelna turah duhsakna hlanin, harsatna an neihte a tul anga a hnena thlen thin turin a chah.
He hunah hian Aizawl khawpui chhung kohhran hrang hrang hmeichhe pawl aiawhte an tel a, hunserh infuihna te, tawngtairualna te, hriatrengna pual bati chhitna hunte buatsaih a ni.
Post a Comment