May 30, 2024 (Rauthla) : Vawiin khan Zoram People Movement, Lai District Hqrs. General Conference vawikhatna chu Central YLA Hall, Lawngtlai -III ah neih a ni.
He hun hmanpui tu Dr. Lorrain Lalpekliana Chinzah, Adviser to Chief Minister (Agriculture & H&FW) chuan thusawiin, ZPM ten Pathian leh mipui zarah sorkarna kan chang thei a. Party dangte tih ngam loh party inthlan kan buatsaih thei hi thil danglam tak a ni a. Hei hi party leh party inbeihnaah ngaih loh tur a ni. Kan hruaitute hian kan duh zawng Hruaitu thlang thei tura ruahmanna an rawn siam ani tih hria a, in lungrual taka ke pen zel turin Party mite a sawm a ni.
Dr. Lorrain Lalpekliana Chinzah chuan, Mizoramah ZPM in sorkarna a siam theih chhan hi Pathiana innghat tlat kan nihna piah lamah hruaitute do lova kan thawhpui thatna zar a ni, tih hi hre reng ila. Kumin a Hruaitu thar kan thlan turah pawh hian hruaitute do zawnga kal lo leh thawhpui zel ila. Mahni leh mahni kan indo chuan hmasawnna kan nei thei dawn lo. A chhunga chengte lungrual taka kan awm chuan hnehna kan chang zel ang. Kan hma lawk ah Lai Autonomous District Council ah Village Council inthlan kan nei dawn a, party mi ticket dil tam tak in awm a, thenkhat chang lo pawh in awm ngei dawn. Chung hunah pawh chuan ticket chang ve ta lo te pawhin kan party leh kan khawtlang tan ti a, kan party aiawh te theihtawp chhuah a kan thawhpui zel a ngai dawn a ni, a ti a. Party do zawngin tumah awm lo ila, kan chakna chu in lungrualna a ni tih hre reng a, kan hma lawk a inthlan lo awm turah ZPM in hnehna a chang ngei theihna tan ila ang u, tiin party mi kalkhawm te a chah.
Dr. Lorrain Lalpekliana Chinzah chuan, ZPM innghahna chu Pathian ani a, kan tun dinhmun min hlangkaitu pawh Pathian ani tih hre reng ila. A duh dan anga rorelna kan kal pui a, a chhelai siamthatu nih kan tum theuh tur a ni. Chuvangin, kan Ram hmasawnna tura hna kan thawhna kawngah rinawmna leh dikna in ro kan rel ang a. Kan inthlan dawn a, kan thupui 'Ka eiru dawn lo' tih hi kan kalpui zel ani tih hria ila. Chu eiruna do tur chuan kan tanrual a ngai a, thil tha lo tih Kan hriat reng te chu ti lova, a tha zawk thlang zel tura hma thar kan lak a ngai a ni, tiin party mite hruaitute do zawng ni lova thawhpui thiam zel turin Party mite chu a chah bawk a ni.
Dr. Lorrain Lalpekliana Chiznah chuan, tun hnaia REMAL Cyclone avanga nunna chante, hliam tuarte, chenna In nei lo leh hemi avanga harsatna tawk zawng zawngte a tawrhpui thu a sawi bawk.
Chawhnu lamah ZPM Lai District hruaitute inthlanna neih a ni a, President ah Pu MC. Lalramchhana thlan niin, Vice President Pu J. Zahlira thlan a ni a, Treasurer ah Pu H. Lungrualkima chu cuhtu awm lovin a tling bawk.
Post a Comment