April 13, 2024 (Rauthla) : Mizoram Football Association buatsaih MFA Cup 2023-2024 Final chu vawiin khan CYLA Playground-ah MLS FC (Lawngtlai DFA) leh FC Bethlehem (Aizawl DFA) ten khelin, 2-1 in MLS FC (Lawngtlai DFA) ten FC Bethlehem (Aizawl DFA) hnehin, 22nd MFA Cup 2023-2024 ah Champion an ni ta a ni.
22nd MFA Cup 2023-2024 kharna Inkhawmah hian Central YLA President Pu HC. Vanlalruatpuia chu khuallian niin, khuallian chuan, infiamna kawngah hlawhtlinna kan chan theihna tur chuan hriselna tha kan neih a ngai a, chutiang chuan faina leh thianghlimna kawngah tan kan lak a ngai hle ani, a ti a. Tunlai thalaite min run mektu ruihhlo lakah kan fihlim a ngai bawk a, ruihhlo hian Zoram Kristian ringtute min tibuai hle, hemi laka fihlim lo te tan infiamna kawngah hlawhtlinna tak tak a neih theih loh avangin kan fimhlim kan tihrual in a do tu thalai infiammi ni ila. Ruihhlo in a tihbuai loh leh mahni inthununna neitu thalai nih tum ila. Kan tum kan hlen chhuah ngei theihna turin keimahni a awm insumtheihna hian in thunun ila, chutiang Chuan infiam mite hi midangte kawng kawkhmuh tu nih i tum ang u, tiin infiammite a sawm a ni.
MFA atangin Pu RK.Rozidinga'n thusawiin, Zofate football a hma kan sawn zel theihna turin inpekna leh thawhhona tha kan neih a ngai a. MFA hian amah chauhin football hmasawnna a kalpui thei lova. District Football Association te nen thawhhona tha tak nei a kan kal a ngai ani, a ti a. 22nd MFA Cup 2023-2024 denchhena AIFF leh MFA te buatsaih a, AIFF 'D' Certificate Coaching Course training buatsaih ani te hi a lawmawm hle a. Hei hian coaching lamah pawh hma min sawn tir ngei pawh MFA chuan a beisei a ni, a ti a. Referee leh coaching lamah pawh hmasawn zel turin tan ila thar zel ang u, tiin Final khel turte chu Champion ngei turin duhsakna a hlan bawk a ni.
Champion team MLS FC (Lawngtlai DFA) te hian Trophy, Certificate leh Nuai 1 an dawng a, Runners Up FC Bethlehem (Aizawl DFA) te hian Trophy, Certificate leh Rs. 50,000 an dawng a. Fair Play Award dawngtu Venglai FC (Lunglei DFA) ten Trophy leh Rs. 10,000 an dawng bawk a. Mimal chawimawina dawngtute chu Best player FC Bethlehem Jersey No 16 Kiran Chhetri thlan niin Trophy leh Rs. 5,000 hlan a ni a, Top Scorer ah goal 12 khungtu Khawzawl Vengthar GSA Jersey No 14 Lalrintluanga niin, Best goalkeeper ah MSL FC (Lawngtlai DFA) goal vengtu Jersey No 21 Lalvanlawma thlan niin, Venglai FC (Lunglei DFA) hnenah Fiar Play Award hlan a ni. Hemi bakah hian Semi Finalist Model United FC (Siaha DFA) leh Venglai FC (Lunglei DFA) te hnenah Rs. 15,000 ve ve hlan an ni bawk.
Post a Comment