April 17, 2024 : Lok Sabha Inthlanpui, 2024 thawh khatnaa 1-Mizoram Parliamentary Constituency-a April 19, 2024 (Zirtawpni)-a inthlan buatsaih turah Lawngtlai District chhunga polling station 181 zinga Lawngtlai aṭanga hla zual polling station 116-a duty tur polling party-te chuan vawiin khan Government Lawngtlai College aṭangin an duty-na tur hmun an pan a. Sector bial ṭhen viltu tur sector magistrate 15 chuan an duty-na tur hmun an pan ve nghal bawk.

Polling Party kal chhuak turte hian Government Lawngtlai College-a Dispatch & Receiving Counter aṭangin inthlan buatsaihna tur hmanrua leh bungruate lam khawmin, strong room aṭangin EVM leh VVPAT an la chhuak a. An bungruate an endik fel vek hnuah an duty-na tur hmun panin an chhuak a. Polling party kal chhuakte hi Lawngtlai District Election Officer Pu Cheemala Siva Gopal Reddy chuan Government Lawngtlai College tual aṭangin a vai liam a ni.

Vawiin hian 36-Tuichawng assembly biala polling station 70-a polling party-te chuan an zavaiin an duty-na tur hmun an pan nghal vek a. 37-Lawngtlai West biala polling station 69 awm zinga polling station 32-a polling party-te chuan an duty-na tur hmun panin, 38-Lawngtlai East biala polling station 42 awm zinga polling station 14-a polling party-te chuan an duty-na tur hmun an pan ve bawk a. Tuichawng bial chhunga sector magistrate 11, Lawngtlai West bial chhunga sector magistrate 3 leh Lawngtlai East biala sector magistrate 1 chuan an bial (sector) an pan ve nghal bawk.

P-2 polling party vawiina an duty-na tur hmun pan zingah hian 36/54-Boraituli Polling Party-te chu chhuak hmasa berin, zing dar 7:40-ah an duty-na tur hmun panin an chhuak a. Vawiina chhuak zinga chhuak tlai ber 37/31-Saikhawthlir Polling Party te chu chhun dar 12:00 khan an duty-na tur hmun panin an chhuak ve thung a ni.

Post a Comment

Powered by Blogger.