April 17, 2024 (Rauthla) : Lawngtlai District Election Officer Pu Cheemala Siva Gopal Reddy chuan vawiin khan Lawngtlaia thuthar thehdarhtute hnenah Lok Sabha inthlan lo awm tura an inbuatsaih dan leh hma an lak dante a hrilhfiah.
Pu Cheemala Siva Gopal Reddy chuan Lok Sabha Inthlanpui lo awm tur atana Electoral roll hman tur buatsaih hna chu January ni 6 atanga tanin 28th March, 2024 khan inthlana hman turin peih fel a ni tih sawiin, tun dinhmunah hian Lawngtlai District pumpui-ah vote nei mipa 46150 leh hmeichhia 46305 awmin a vaiin mi 92455 in vote an nei a, mipa aiin hmeichhe vote nei hi za chuang hlekin tam zawkin mipa 1000 zelah hmeichhia 1003 an awm mek thu a sawi bawk. Heng vote nei zawng zawng zingah hian PwD voter kan tih ang kha mi 466 awm anga chhinchhiah a nih thu leh, heng zingah hian mi 4 chauh certificate nei mahni ina vote thlak thei an awm a, chung zinga 3 chuan vote an thlak tawh bawk a ni. Tin, Kum 18 atanga 19 inkar hi mi 4905 (5.31%) awmin kumlama upa (85+) hi mi 235 (0.25%) an ni mek tih a sawi bawk.
Lawngtlai District Election Officer chuan 'Lawngtlai District-ah hian Assembly Segment 3 awmin Polling Station 181 kan nei mek a, heng zinga Hlimzawl Polling Staion-ah hian vote 51 awmin, vote nei tlemna ber a ni a, Pangkhua Polling Station-ah vote 1136 awmin vote nei tamna ber a ni, a ti a. Tun dinhmunah chuan Electoral roll hi inthlanna atana hman mai theih turin peihfel vek a ni tawh a, Postal Ballot leh EDC te pawh mark fel vek tawh a ni, a ti bawk.
Lawngtlai DEO chuan Polling Station 181-a hman atan Polling Station zawng zawng daih bakah reserve atana hman turin BU-119, CU-102 leh VVPAT-140 an neih thu sawiin, Sector Magistrate 27 leh SDO(Civil), Chawngte leh Sangau te hnenah a tul dan ang zelin issue tur a ni, tih a sawi a. EVM leh VVPAT an ngah tawk thu leh, khawl chhe palh a awm pawhin buaina a awm lo turah an ngai tih a sawi bawk.
Pu Cheemala Siva Gopal Reddy chuan Lawngtlai District pumpui chu Zone paruk (6) ah thenin Zone tinte chu Zonal Police Officer ten an vil mek thu sawiin, Sector Magistrate 27 ruat bawk niin chungte chuan Sector Police Officer te nen mahni bial theuh an vil bawk a, inthlan kaihhnawiha buaina leh harsatna a lo awm palha an bial chhunga Polling Official te'n an rawn mai theih tur leh, District Control Room lama thu thlen zung zung turin an inring reng bawk tih a sawi.
Police lamin Quick Response Team (QRT) pasarih (7) siamin, heng team-ah te hian State Police Officer pakhat leh CAPF Section chanve zel zawmin a tul hun apianga buaina chingfel zung zung thei turin an inring reng tih Lawngtlai DEO chuan sawiin, Sub Divisional headquarters pathum (3) vil turin District Striking Force pakhat (1) theuh siam a nih thu a sawi a, EVM Strong room, DC Office Complex-a mi chu IR Bn Section khat (1)- in vengin Govt. Lawngtlai College-a mi chu BSF ten engtiklai pawhin an veng bawk, a ti.
Lawngtlai DEO chuan inbiakpawhna lama harsatna awm thei laka inven nan Polling Station 122 laiah WT set pek an nih thu sawiin, Bangladesh nena kan inrina leh Myanmar nena kan inrina chu BSF lch Assam Rifles ten engtiklai pawhin an ven reng thu a sawi bawk.
Post a Comment