Lawngtlai 22.03.2024 : Vawiin hi khawvel pum huapa tui ngaihhlut inzirtir ni, "World Water Day 2024" a ni a. Tukin zingkar khan Public Health Engineering Department (PHED), Lawngtlai WATSAN Division buatsaihin Areopagy, Lawngtlai Bazar-ah he ni pual hian hun hman a ni.

He hunah hian PHED Lawngtlai WATSAN Division-a Sr Executive Engineer Er Netralal Jaisi chuan thu sawiin, World Water Day chu khawvel puma tui hlutna inzirtirna leh tui humhalh kawnga thawh hona ṭha siam tura infuih tharna ni atan hman ṭhin a nih thu a sawi a. Tui chu mihring nunna hnar pakhat a nih avangin ram leh ram inkarah te, khua leh khua inkarah te tui inchuh avanga harsatna leh innghirnghona a thleng fo tih sawiin, tui mamawhna avang vekin inremna leh inhriat thiamna an siam ṭhin bawk tih a sawi a. Kal khawmte chu tui hmanga inremna a awm zel theih nan mahni hmunah ṭheuh ṭan la turin a chah a ni.

PHED Sr EE Er Netralal Jaisi chuan India ram chu tui vanga harsatna tawk thei dinhmun him lo takah kan awm mek tih sawiin, Mizoram pawh kan lo neih dan leh khawsak phung avanga tui harsa chho zel tur dinhmunah kan ding tih a sawi a. Tui leh tui hnar humhalh leh siam belh kawngah department hrang hrang hma lakna inchawm tawn turin sawrkarin ruahmanna a kalpui tih sawiin, tui renchem te, tui hna siam tura thing phun te, tuikhuah siam leh ruahtui khawl te chu tui harsatna pumpelhna atan uar deuh deuh turin kal khawmte chu a chah bawk a ni.

He hun hi PHED Lawngtlaia Sub-Divisional Officer Er L. Sangromuana chuan kaihruaiin, World Water Day 2024 puala PHED Lawngtlai te hma lakna leh hmachhawp a tar lang a. World Water Day pual hian youtube leh local cable TV kal tlanga tihchhuah tur talk show buatsaih a nih thu tar langin, kawng zawh buatsaih a nih dawn bakah, Lawngtlai tui lak hnar, Chengkawl lui, Chhimtuipui tihfai hnatlang buatsaih tum a nih thu a sawi bawk.


Tukina Lawngtlaia World Water Day puala hun hmanah hian sawrkar official-te, khawtlang hruaitute leh tlawmngai pawl ai awhte leh thu thar theh darhtute an tel a ni.


Hun hman zawh hian Lawngtlai District Information & Public Relations Officer Pu C. Lalhruaitluanga chuan World Water Day puala kawng zawh (rally) kalpui turte chu vai liamin, he huna telte hian thuziak - banner, pamphlet leh flag te kengin Areopagy aṭangin Lawngtlai khawpui chhungah kawng an zawh a ni.


World Water Day hi United Nations (UN) bul tumin kum 1993 aṭang khan khawvel pumah kum tin March ni 22-ah hman ṭhin a ni a. Tui pawimawhna leh hlutna te, humhalh leh renchem a ṭulzia te au chhuahpuina leh inzirtirna ni atan hman ṭhin a ni a. Kum tin thupui thlan bik awmin, kumin 2024 hian thupui atan, 'Inrem Nan Tui (Water for Peace)' tih hman a ni.

Post a Comment

Powered by Blogger.