March 22, 2024 : Vawiin khan Lawngtlai District Election Officer Pu Cheemala Siva Gopal Reddy hovin Mizoram Parliamentary Constituency-a April ni 19, 2024-a Lok Sabha Inthlanpui 2024 buatsaih tur atana Lawngtlai District chhunga inpuahchahna kalpui mek dan thlir hovin inthlan kaihhnawiha mawhphurhna hrang hrang neite chu Lawngtlai DC Conference Hall-ah an ṭhu khawm.
He hunah hian Deputy DEO Pi B. Malsawmtluangi bakah, election official-te, Nodal Officer leh Assistant Expenditure Observer-te, Accounting Team, MCMC, FST, SST, VST, VVT leh Complaint Monitoring Team member-te an kal khawm a. Team hrang hrang hma lakna report ngaihthlak niin, felfai zawka duty kalpui dan tur leh report pek dan tur te sawi ho a ni.
Lok Sabha Inthlanpui 2024 puan a nih rual khan Lawngtlai District chhunga inthlan kaihhnawih team hrang hrangte chuan hna an thawk ṭan nghal a. Tun thlengin Model Code of Conduct bawhchhiatna report dawn a la awm lo va; mipui a mamawhte tana biak pawh turin District Contact Centre pawh tihnun nghal niin, zawhna dawn an la nei lo va. Excise & Narcotics report aṭanga a lan danin, inthlan puan hnuah ganja kilogram 20.191, heroin gram 110.39 leh rakzu litre 200 vel chu man tawh a ni.
Post a Comment