January 29, 2024 (Rauthla) : Central Young Lai Association chuan Tahrik ni 24th January 2024 nilaini a, Rakachhuah khua mi pali in Zawasa, ECM Veng, Siaha rawng taka an thah chungchang thu kal zelah an thawhpui MTP te, thu bul leh bal hre chiang loa mipui ten an dem viau mai chu pawi an tih thu an sawi a. He thihna avanga Tuipui Ferry leh Lawngtlai khaw chheh vela thil thleng chungchang hi a bul atanga a tawp thlengin Central YLA chuan a hriatpui a ni, an ti bawk.
CYLA chuan a rang thei ang bera ruang hmuh a nih theih nan Central YLA hruaitute leh MTP hruaitute inbiak rem angin, tualthattu te zinga mi pakhat hi ruang an dahna hmun (Lawngtlai) a hruai tur leh ruang hmuh a nih hnua a rang thei ang bera Tuipui Ferry, Siaha District-a dah let leh ngei tura in remna siam a nih angin ruang leh tualthattu hi Tuipui Ferry, Siaha District ah Central YLA kaihhruaina hnuaiah dt. 25th January 2024 ningani zan khan dah let leh a ni, an ti a. Tualthattu zinga mi pakhat dah let leh a nih lai hian Tuipui Ferry, Siaha District-ah hian MTP member/mipuite sawi tham an awm tawh loh avang leh Mizoram Police te an tam tham em avang hian MTP hruaitute kut atang hian Mizoram Police te hian tualthattu hi an hneh chhuh tih an sawi bawk.
CYLA chuan he thil thleng chungchanga thu hrechiang lo mi thenkhat ten MTP hruaitute an dem hrawn hi tha lo a ti takzet tih an sawi a, MTP hi Mara ram leh hnam tana ding, a tul huna lu chhum ban chhum huam an nihna hi hriatpui a, he thil thleng chungchangah pawh hian lungrual taka Mara mipuite ke pen ho turin Central YLA chuan a duh hle a ni, tiin vawiin khan thuchhuah an siam.
Post a Comment