October 3, 2023 (Rauthla) : Nimin khan Penticostal Youth Department, North East India pumpui a thalai ten vantlang tan thil tha tih ni atan an hmang a. Hemi ni denchhen hian Lawngtlai District PYD NEI te chuan District Hospital, Lawngtlai Blood Bank ah a mamawhtute tan thisen pek runpui an nei.
He hunah hian Evan GB. Lalawmpuia, Secretary District PYD (NEI) in a kaihruaiin, kum 1999 khan General PYD chuan Vantlang tan thil tha tih ni atan kum tin Ocotber Ni 2 ah hman thin nise, an ti a. Hei hi Kum 2000 kum atanga hmang tanin thisen pek te, Khawtlang tihfai hnatlang te an lo thawh thin thu a sawi lang bawk a ni.
He hun hmanpuitu Association For Voluntary Blood Donation, Lawngtlai President Pu Elvis Lalthangzuala’n thusawiin, PYD (NEI) ten vantlang tan thil tha tih Ni atan thisen pek runpui an buatsaih tur chu lawmawm a tih thu leh Kristian thalai ten Vantlang tan thil tha tih Ni atan hun kan han serh hrang thei hi a ringtu nunzia hle a. Thisen pek hmanga rawngbawlna hi a hlu a, a hlutna man pha Kohhran Thalaite hian he rawngbawlna hna hi i chhunzawm zel ang u, a ti bawk.
He hunah hian Pastor S. Vanlallunghnema’n tawngtaina neiin thisen pek runpui hi neih tan nghal ani. Thisen hi Unit 25 an pe a. Thisen petu te hi mipa 20 leh hmeichhia 5 te an ni.
Nimin vantlang tan thil tha tih ni ah hian Lawngtlai District PYD a Pastor Bial paruk (6) te hun an hmang a ni.
Post a Comment