October 3, 2023 (Rauthla) : Vawiin khan Govt. Region Higher Secondary School Hall, Lawngtlaiah National Voluntary Blood Donation Day 2023 hman niin, Central YLA President Pu HC. Vanlalruatpuia chu khuallian a ni. Govt Region Higher Secondary School leh Jehova Jire School zirlaite he hun hmannaah hian an tel.
Khuallian Pu HC. Vanlalruatpuia, Central YLA President chuan thisen petute chu midangte tan malsawmna thlentu an ni tih sawiin, chutianga midangte tana luangchhuak thei tur chuan nun uluk erawh a ngaih hle thu a sawi. Zirlai kalkhawmte chu midangte tan malsawmna ni tura an thatlai hun vanglai hunhman tum turin a chah a, chu chu Pathian hnen atanga malsawm kan dawn theihna tur kawng pawimawh tak a nih thu a sawi bawk.
Khuallian chuan thisen pek hi midangte tan mai ni lo, keimahni ngei tan pawh a tha a. Kan dinhmun kan inhriatchianna a nih tlat avangin thalaite hian kan nihna hi kan hriatchian fo theihna turin Thisen pek hi kan uar zual sauh sauh a ngai a ni, ti a. Thalai hrisel leh chak zawk te zingah thisen pe thei lo kan awm chuan eng nge a chhan tih te pawh ngaihtuah a tha hle, a ti a. Midangte’n nun an lo neih a, malsawmna thlentu ni thei ngei turin zirlai kalkhawmte chu nun uluk theuh turin a chah bawk a ni.
Vawiin hun hmanaah hian thupui thlan bik pathum hmangin zirlai kalkhawmte hnenah Awarenss neih a ni a. Dr. B. Laldinliana (Med. Supt. CHL) hnen atangin ‘Thisen pek thatna leh thisen pe tura nunphung hrisel’ tih thupui hmangin thu a sawi a. Nl S. Ramdinengi, Councillor Moblie ICT hnen atangin ‘HIV chungchang inzirtirna’ leh ‘Voluntary Blood Donation awimawhna' tih AVBD, Lawngtlai President Pu Elvis Lalthangzuala hnen atangin ngaihthlak a ni bawk.
National Voluntary Blood Donation Day-ah hian Lawngtlai District HIV dinhmun pawh tarlan a ni a. Kum 2004 a Lawngtlaia HIV positive kai hmuhchhuah a nih atanga kumin September thla thleng hian thisen test mi 28344 atangin HIV positive 529 an awm tawh a. HIV natna avanga nunna chan mi 12 an awm tawh bawk. Kumin January atanga September thla thleng hian HIV positive mi 75 hmuhchhuah an ni tawh a. Heng zinga natna hrik kai tam zawk te hi Damdawi inchiu thin te an ni.
National Voluntary Blood Donation Day hmanna hi Pu C. Lalhmachhuana, Asst.Secretary, AVBD, Lawngtlaiin a kaihruaia a. Rev. V. Lalhmingsanga’n hunserh hmangin, Lalzawmpuii Hrahsel in kalkhawmte zaiin a awi bawk a ni.
Post a Comment