October 5, 2023 (Rauthla) : September ni 28 atanga khelh tan Lawngtlai District Football Association (LDFA) hnuaia Women Committee leh Grassroot Committee buatsaih, LDFA Cup 2023 chu vawiin khar a kharna neih a ni a, Pu C. Rongura, EM i/c LAD etc., LADC chuan khuallian niin hun a hmanpui.
Khuallian chuan tunlai infiammite vanneih zia sawiin, field tha tak Lawngtlaiin a nei chu tangkai pui turin a chah a. Local ah tawp mai lova, Mizoram, nationAL leh international thlenga phochhuah tlak theihna kan neih thu sawiin, chumi puitlin tur erawh chuan ruiihlo lakah insum a ngai a ni, a ti. Sport hi thiantha siamna a ni a, politic ah hmelma ram awm mahse, infiamnaah chuan hmelna ram a awm lo, a ti a. Hotute thuawi a, nu leh pa thuawite chuan sang tak an thlen theih thu leh, Lairam timawitu an la nih theih thu player-te a hrilh a ni.
Pu C. Hrangthianga, LDFA President chuan football zirna (Academy) tha tak kan kalpui a, hei hi kan district hian hma kan sawn pui hle a, academy player te hi Lawngtlai tihmingthatu leh Lawngtlai Veng/khua player tha tha te an ni mek, a ti a. Women lam pawh hma kan sawn a, kan player pahnih Mizoram team-ah an tel a, India rama champion an ni a, Junior team ah pawh pahnih an tel a ti, bawk.
LADC a Sports & Youth Department changtu EM Pu C. Hrangthianga chuan Sorkar angin football tuimi tan kawng kan zawng zel dawn a, chutah chuan a ti tak taktu in pawimawh dawn a ni. Theihtawp kan chhuahpui zel dan che u a. Sorkar leh Association anga chherchhuah tlaka kan awm a ngai, a ti.
Vawiin final match-ah hian hmeichhe lamah AOC Veng chuan Chandmary Veng chu 2 -0 a hnehin an champion a. Under-14 ah Chandmary chuan Council Veng chu 1 - 0 a hnehin an champion a. Under-12 ah Bazar A chuan Mampui chu 1 - 0 hnehin an champion bawk.
LDFA Cup 2023 ah hian Women bikah team 9, Under - 12 ah team 16 leh Under - 14 ah team 11 te an tel a ni.
MIMAL LAWMMAN
WOMEN
Top Scorer : Pc. Lalhmingtluangi, AOC Veng (Goal 8)
Best Player : Lallawmchhungi, AOC Veng
Best Goalkeeper : Vabeisongia, Chandmary
Fair Play : Chandmary
UNDER-12
Top Scorer : Matthew Malsawmtluanga, College Veng 'A' (Goal 3)
Best Player : Rohmingmuana (Mampui)
Best Goalkeeper : Lalfakmawia, Bazar 'A'
Fair Play : New Vengpui
UNDER-14
Top Scorer : Donny MS Dawngropuia, Bazar (Goal 2)
Best Player : Lalhriatpuia, Council Veng
Best Goalkeeper : Christopher Mualchin, Chandmary
Fair Play : Lawngtlai Vengpui
Post a Comment