October 2, 2023 : Tukin khan Lawngtlai District Deputy Commissioner pisa tualzawlah UD&PA Department, Lawngtlai District buatsaihin Cleanliness Week 2023 hawnna hun hman a ni a, Pu C. Rongura, Executive Member i/c LAD, LADC chuan khuallian niin hun a hmanpui a, he hunah hian NSS, Government Region Higher Secondary School zirlaite an tel a ni.

Pi Margaret J. Vanlalremmawii, SDO (S) kaihhruai he hun hmannaah hian khuallian chuan faina chu mahni ṭheuh atanga inṭan tur a nih thu leh fai duhna chu kan nunphung a bet tlat tur a nih thu a sawi a. 'Fai leh thianghlimna ngaina mi ni tur chuan ruihtheih thil, zuk leh hmuam lak ah taksa vawn thianghlim a pawimawh a ni' a ti a. Lawngtlai khawpui chu district hmunpui a nih angin faina kawngah khaw dangte entawntlak ni turin bawlhhlawh thliar leh vawi khat hman plastic hman kawngah fimkhur a ṭul thu sawiin district fai leh thianghlim a siam tur chuan a chhung a cheng mi tin an pawimawh thu a sawi bawk.

Lawngtlaia Cleanliness Week 2023 hawnnaah hian fai tura thutiam lakna hun hman niin Pu Elvis Lalthangzuala, President, Lawngtlai District VC Association in a kaihruai a. Upa K.Zozamliana, Secretary BCM Bazar Veng Lawngtlai in hunserh a hmang a, Pu HC. Vanlalruatpuia, Sr. Sanitation Officer, LADC in lawmthu sawina hun a hmang bawk a ni. Vawiin hian Lawngtlai khawchhung veng hrang hrangah Village Council kaihhruainain faina hnatlang kalpui a ni ang.

Post a Comment

Powered by Blogger.