October 1, 2023 (Rauthla) : Lai Students' Association, Jt. Hqrs., Aizawl chuan nimin khan Vanapa Hall-ah Freshers Social an buatsaih a, Pu Andrew Laltlanzara, EM i/c Education (MS), LADC chuan khuallian niin hun a hmanpui a. LSA Gen. Hqrs., Lawngtlai President Pu F. Vanlalruatpuia chu khualzahawm a ni bawk.
Khuallian chuan kan khawvel hmachhawn mek chu a thiamte din channa khawvel a nih avangin degree hawn mai a tawk lova, competitive exam hmachhawn thei tura inzir a ngaih thu a sawi a. LADC hnuaiah pawh Recruitment Rules hmangin Competitive Exam hmanga hnalak thin a ni tih a sawi bawk.
Pu Andrew Laltlanzara chuan tun zirlaite chu kan hnam innghahna leh min timawitu an ni tih sawiin, Lairam chhungah lehkhathiam an tam chuan a thlamuanthlak hle dawn a ni, a ti a. Zirlaite chu lehkha an zirlai lai chuan kohhran leh khawtlangah mi tangkai nih tum hmasa lo tura chahin, Kohhran leh khawtlang tanga mi chhawrtlak leh tangkai ni turin zirna lamah hlawhtling tum phawt turin a chah.
Khuallian chuan Act East Policy a puilting tep tawh a, khawvel kawtchhuah kan la ni thuai dawn a, hemi hre chunga lehkha zir a ngai a ni, a ti a. ‘Sorkar hnain min daih vek lova, Eizawnna kawng hrang hrang te pawh kan dap thiam a, Entrepreneurship lamah kan harhchhuah a ngai, a ti bawk.
F. Lalremruathangi kaihhruai he hunah hian LSA member 600 chuang an kal a. LSA Jt. Hqrs. Aizawl hi kum 1984 khan din a ni a, tunah hian member 1000 bawr vel an awm a. Freshers Social hi kum tin, Covid hre len lai tih lohah chuan hman a ni a, kumin hi a vawi 37-na a ni.
Post a Comment