October 28, 2023, Lawngtlai : Lai Tho Tawlreltu Bu bultumin nimin khan Central YLA Playground-ah Chin New Year, Lai tho-2023 hman niin, he hun hi Pu Joseph Lalhmingthanga Chinzah, General Secretary, CYLA chuan Khuallian niin a hmanpui.
Khuallian Pu Joseph Lalhmingthanga Chinzah chuan Laifate chu tun hma chuan ram zau tak nei a khawsa kan ni tih sawiin, British runna avangin awpbeh kan ni a. Ram bung hrang-3 ah then hran kan lo ni ta a ni. Ram buai avangin kan Unaute hi Lawngtlai khawpuiah kan tlankhawm mek zel a, inpumkhatna tha leh thawhhona tha nei zel turin ka chah duh che u a ni, a ti.
CYLA GS chuan Laifate hi hnam zah tlak, hnam chhuantlak ni thei turin Lawngtlai hi Laifate Jerusalem ah pawm ila, India ram thlazar hnuaiah Look East Policy hmangin mahni kutke a kan din theih nan hma la ila, Laifate hi Economically a independent kan nih theih nan kan beih a ngai a. Chumiah chuan Lai hnam angin kan parchhuak thei dawn a ni, a ti a. Tuna kan dinhmunah hian lungawi a, dawmkun mai lo a, hmalam thlir chunga hnam anga kan parchhuah ve theihna ngaihtuah chungin theihtawp i chhuah zel ang u, a ti bawk.
CYLA chuan khawvel hmun hrang hranga Laifa awmte zingah a thiam bik te an thiamna hmang tangkai thin turin hma a la mek zel, a ti bawk.
Central YLA General Secretary Pu Joseph Lalhmingthanga hi Central YLA Vice President Pu F. Lalrothanga leh Secretary Pu V. Lalengvara te bakah CEC member te'n ṭawiawm a ni.
Lawngtlaia Lai Tho, Chin New Year hmannaah hian Pu Lai Biak Lian, Chairman, Lai Tho Tawtreltu Bu chuan kalkhawmte lawmna thu leh hun buatsaih dan sawina a nei a ni.
Vawiin hian a kharna YLA Bazar Branch Hall-ah hman a ni ang a. Vawiin a tawp kharnaah hian Pi Alinery L. Lianhlawng, Chairman ICF chu khuallian a ni dawn a, Pi Ngurnunsang Cinzah, Principal NES chu khualzahawm a ni bawk ang. He hunah hian Cultural Show, zai leh lam te leh item chi hrang hrang neih a ni ang. Lai Idol top 10 a tlingte an zai bawk ang.
Nimin Chin New Year hi intihsiakna hrang hrang hmanga neih a ni a. Hmeichhia leh Mipa intlansiak, Hruipawh hmeichhia leh Mipa, Maua inlawnsiak leh Lai Paih te neih a ni. Lai Paihah hian Lawngtlai khawchhung atang leh hmun hrang hrang atangin Laifa Lai Paih thiam mi 19 an tel. Lai Paihah hian Biakhleisanga, Halkha chu pakhatna niin, Hmingthantluanga, AOC chu pahnihna a ni.
Post a Comment