October 15, 2023 : Nimin chawhnu khan Tuipui Ferry, Lawngtlaiah Daniel V. Lalrinchhana, kum 32, Lawngtlai Vengpui chu chesualin veng hrang hranga mi tlawmngai ten an zawng mek a. Vawiin khan Pu Joseph H. Lalramsanga, Deputy Commissioner, Lawngtlai chuan a hmunah kalin tlawmngai a thawkchhuakte a tlawh a. Pu R. Lokeshwaran, SP, Pu Abrahma Beirazi Khithie, Addl. DC leh Pu Hmingthanzuala, DIPRO ten an ṭawiawm a ni.
Deputy Commissioner Pu Joseph H. Lalramsanga chuan Tuipui Ferry-a tui tla zawnna hmun a Lawngtlai Vengpui khawtlang hruaitute kawmin tui tla zawng a thawkchhuakte in tur tui thianghlim leh silpoulin bak ah a ṭul a piang a hman tur pawisa fai a hlan a. Chhetsualna tawk chhungkuate hnem a, a ṭul a piang titur a tlawmngai a lo thawkchhuakte chu zo nun ze mawi chawi nungtu leh mizo nih tinuamtute an nih thu a sawiin an hmalak zelna tur ah harsatna a awm a nih chuan DC office chu an inhawn reng tih a hrilh bawk a ni.
YLA Lawngtlai Vengpui Branch leh MTP Tuipui Ferry Branch te kaihruaina hnuaiah ruang hi zawn chhunzawm a ni a, tui lian leh nu avangin chanchin buatsaih lai thleng hian Tv. Daniel Lalrinchhana ruang hi hmuh a la ni lo. Tui chhunga luhin awmzia a awm loh avangin tuipui kam aṭanga ruang lang nghah bâk tih theih a awm lutuk lo a. Tui a khauh avangin ruang hi tuiin a len thlà turah ngaih a ni a. Kawlchaw, Liapha, New Tuidangchhuah, Hruitezawl etc. te pawhin ruang hi an zawng reng bawk a, Central YLA hruaitute'n a hmunah uapin an vil reng bawk a ni. Vawiina ruang zawn hnatlanga thawkchhuak YLA leh MTP member bakah mi tlawmngai zawng zawng hi mi 800 chuang an ni.
Post a Comment