October 16, 2023 (Rauthla) : Vawiin khan Lawngtlai Deputy Commissioner Pu Joseph H. Lalramsanga chuan a Pisa-ah Lawngtlai District MJA te a kawm a, Inthlanna felfai, thianghlim leh langtlang a awm theih nan a tul apiangah mipuite kaihhruai leh finchhuah kawngah thawhho pui ah a sawm.

He inkawmhonaah hian Lawngtlai DC chuan Election kaihhnawih/buaipui chungchangah Lawngtlai District chu a titha pawl an nih thin thu a sawi a, tun tum MLA inthlanah pawh Mizoram a tiáš­ha ber nih an tum thu a sawi. Pu Joseph H. Lalrtamsanga chuan inthlan bak thildang an hawi thei lutuk lo tih sawiin, inthlanna felfai leh thianghlim a awm theih nan Political party te an pawimawh hle a ni, a ti bawk.

Lawngtlai district-ah MLA inthlanna tha tak a kalpui a nih theih nan kawng hrang hrangin inbuatsaihna neih a nih thu a tarlang a. Inthlanna felfai leh langtlang kalpui turin leh mipuiin an duhthlanna zalen tak a an hman theih nan thutharlakhawmtute chu thawh ho pui ah a sawm a ni. Election Commission of India in inthlanna kalpui dan tur inkaihhruaina felfai tak a siam te rintlak zia mipuiin an hriat theih nan District Election Office-a hmalakna hrang hrangte hriatpuitu ni turin MJA member-te chu a chah a. Inthlanna thianghlim tak kalpui a nih theih nan mipuite zirtirtu ni turin leh a tul apiang ah Sawrkar a mawhphurhna neite pawh finchhuahtu ni zel turin a chah bawk a ni.

District Election Officer ni bawk Pu Joseph H. Lalramsanga chuan Election duty tura an ruat tawh awl dil an awm nual tih sawiin, hei hi pumpelh hram nise a duh thu a sawi a. Mihring an indaih loh zia hria a tlawmngai hram turin duty tura ruat te a ngen bawk. Election chungchanga sorkar finchhuah a ngaihna kawngah finchhuah a, inpuihtawn zel turin MJA te chu a sawm bawk a ni.

He hunah hian Lawngtlai District MJA President Pu Lalngheta Ralte chuan Sorkar leh Journalist te thawhhona a that thu sawiin, intineitu taka an awm thu a sawi. Lawngtlai District MJA dinhmun sawiin, tunah hian MJA member 10 an nih thu leh accredited journalist 7 an awm thu a sawi a. District dangin an neih loh Pension scheme an neih thu te, LCMC&H nen thawhdunna an neih thu te, kum tin Green MJA Day an hman thin thu te leh an pawl hmalakna hrang hrang a sawi bawk.

Vawiin inkawmhonaah hian Lawngtlai District MJA te chuan Lawngtlai Deputy Commissioner Pu Joseph H. Lalramsanga chu District MJA Patron nihna an hlan.

Lawngtlai Deputy Commissioner thar Pu Joseph H. Lalramsanga hian October 14, 2023 khan a hna a rawn zawm a ni.

Post a Comment

Powered by Blogger.