CADC CEM Pu Rasik Mohan Chakma ZPM ah lut dawn. ZPM sorkarna a piang dawn ta

Chawngte 1st.Oct,2023 (Pathianni) : Kumin May 9 Chakma Autonomous District Council (CADC) General Election neih anih khan Mizo National Front (MNF) chuan seat la tam berin MDC seat 10 an la a. Bharatiya Janata Party (BJP) chuan seat 5 lain, Indian National Congress (INC) chuan seat 4 an la thung a ni. Hemi tum hian 15-Rengkashya bialah chuan May ni 17, 2023 khan Vote thlak ani ve thung a, Rengkashya bialah hian INC Candidate Doymoy Daveng Chakma chu hnehna changin INC hian seat 5 an la ta ani.

May 12,2023 khan BJP MDC 3 – Santosh Chakma, Parimal Chakma leh Montu Chakma-ten BJP bânsanin MNF Legislature Party an zawm ta a. MNF Party chuan MDC 13 neiin sorkarna an siam ta ani. 

MNF Legislature Party Leader Rasik Mohan Chakma chuan hemi hnu hian District Council & Minority Affairs Secretary hnenah lehkha thawnin BJP MDC pathumten MNF Legislature Party an zawm tih hrilhin, MNF chuan MDC 13 a nei tih a sawi a, MNF-in sawrkarna an siam theih thu Govenor ah thlen in May 25 khan CEM atan Pu Rasik Mohan Chakma chu lakluh niin MNF party chuan hneh takin sorkarna hi a kalpui ta ani.

CADC ah Pu Rasik Mohan Chakma kaihhruaina hnuaiah MNF party chuan Thla 4 vel sorkarna a kalpui hnu ah kan thudawnna in a sawi danin Pu Rasik Mohan Chakma leh a thawhpui eng emaw zat ten Zoram People Movement (ZPM) chu zawm an tum thu leh CADC ah a vawikhatna atan ZPM in sorkarna a siam dawn ta niin an sawi.

Kumin MLA General Election lo awm turah hian Pu Rasik Mohan Chakma, CADC a CEM hian MNF party atangin ticket a beisei a, a beisei angin party ticket hi chang thei lo turah in hriatna a neih avangin amah leh MDC 16 ten ZPM hi zawm an tum niin kan thudawnna chuan a sawi ani.

Pu Rasik Mohan Chakma hi Tuichawng bial ah ZPM Candidate anih dawn thu tarlan a ni a. October 4,2023 hian ZPM Working President Pu Sapdanga chuan Pu Rasik Mohan Chakma leh a hote hi a lawm lut ang a. Congress MDC erawh hun dang ah lawm luh ani ve thung dawn ani. 

Tun dinhmun ah hian Chakma Autonomous District Council ah hian Elected MDC 20 leh Nominated MDC 4 an awm mek a. Elected MDC 18 te hi MNF party an ni a, INC leh BJP te hian MDC pakhat ve ve an nei thung ani. Nominated MDC te erawh MNF MDC vek an ni thung