September 6, 2023 (Rauthla) : Vawiin khan Lawngtlai Press Club-ah Lawngtlai District MJA te leh Lawngtlai District Information & Public Relations Officer thar Pu Hmingthanzuala te an inkawm.
Lawngtlai District MJA President Pu Lalngheta Ralte chuan Lawngtlaiin District Information & Public Relations Officerr thar kan nei chu lawmawm a tih thu a sawi a. Thawkho kan ni a, kan thawhhona pawh a that tawh thin angin hmalamah thawhhona tha tak a awm chhunzawm zel ka beisei a ti a. MJA President chuan Lawngtlai District MJA anga an hmalak tawhna leh hmalaknate sawiin, Lairam Christian Medical Centre & Hospital nen MoU neiin, Lawngtlai District MJA member te leh an chenpuite damloh, inentirah man tlawm zawka damdawi in awm senso leh inentir senso ruahman a nih dan te, kum tin Green MJA Day an hman thin thute, Journalist Workshop, Political Party hrang hrang IT & Media Cell Awarness, Social Media Awarness an buatsaih thute sawiin, hmachhawp mek engemawzat a sawi a. Lawngtlai District MJA member tan pension scheme kalpui a nih thu a sawi bawk.
Lawngtlai DIPRO thar Pu Hmingthanzuala chuan hnathawk turjn ka lo kal a, hnathawk tur ka nih angin Lawngtlai District hmasawn nan ka thawk dawn, a ti a. MLA inthlanpui kum anih angin mahni duhthlanna dik hmang tur a mipui zirtir kawngah te, Vote thlak ngai pawimawh tur a inzirtir tam a pawimawh thu DIPRO chuan sawiin inthlanna felfai leh langtlang kalpui a nih theih nan inthlanna buatsaih kawnga mawhphurtute chu theihtawp a thawhpui zel turin a chah a. Khawvel changkanna ina a ken tel Media Platform hrang hrang hman thiam a tul thu leh mipui nawlpui tan a thil tangkai leh chhawrtlak thehdarh tam a pawimawh thu a sawi bawk.
Lawngtlai DIPRO chuan Election kum a nih angin sorkar anga hmalakna hrang hrang puanzar kawngah MJA te chu thawhpuiah sawmin, 'Political party tawtawrawtah tang lo ila, mipui kaihruaitu leh hrilhhretu kan nih angin chutiang rilru chu i pu zel ang u, a ti a. MJA welfare a ngaihpawimawh thu a sawi bawk.
Pu Hmingthanzuala hi Aizawl Lungmualah chengin, Directorate-ah awmin, hemi hnu hian Mamit leh Kolasib-ah awm leh in, Lawngtlaiah lo sawn a ni a, nimin khan a hna thar hi a zawm a ni.
Vawiin inkawmnaah hian Electronic Media hman tangkai theih dan te, Sawrkar advertisement kalphung te leh Election kaihhnawiha a tulna apianga mipui zirtir tur a thawhho dan tur te sawi a ni bawk.
Post a Comment