September 26, 2023 : Cheng nuai 179 chuang tih chingpen thubuai avanga thiamloh chan tir CADC CEM hlui Kali Kumar Tongchangya chu kum 4 lungin tang turin leh cheng nuai 4 chawi tura hrem a ni.
CADC in kum 2009 atanga 2013 chhunga Non-Lapsable Central Pool of Resources hnuaia Longpuighat leh Kukurduleya khaw inkar kawng siamna tur, Rs 1129 lakh chuang a dawn atanga Rs 179 lakh chuang khawih chingpena puh, Kali Kumar Tongchangya hi nimin khan Aizawl District Court Special Judge (Prevention of Corruption Act) Dr HTC Lalrinchhana chuan thiam loh a chantir tawh a, vawiin khan a hremna puangin, kum 4 tan ina tang tur leh Rs 4 lakh chawi turin a hrem a, Judge tarlan danin, Kali Kumar Tongchangya sum khawih chingpen hi mimal tana sum hmang a nih loh avangin a hremna pahnih chu hmun khatah kalkhawmtir a nih thu a ziak lang a ni.
CADC CEM hlui Kali Kumar Tongchangya hian CEM a nih lai leh Chakma District Congress Committee President a nih laiin, CADC chhung hmasawnna hnathawh tur sum Rs 179.3773 lakh, chu khawih chingpenin, inthlan campaign nan leh an party hmunhma dinna atan a hmang tih ACB chuan an chhui chhuak a, pawisa khawih chingpen zinga Rs 126 lakh chu man let niin, Court chuan pawisa man let chu sawrkar sumbawm a dah nghal turin thupek a siam tawh bawk a ni.
Post a Comment