September 26, 2023 (Rauthla) : Vawiin khan District Volleyball Association Lawngtlai te buatsaih Opening Season Tournament 2023 chu Lawngtlai Volleyball court-ah khelh niin, a hawnna inkhawmah hian Pu Elvis Lalthangzuala, Sr. Vice President, Lawngtlai District Football Association chu khuallian niin, Opening Season Tournament 2023 chu a ‘Spike Off’ a ni.
Khuallian Pu Elvis Lalthangzuala chuan, Infiammite kan hlawhtlin theih lohna chhan pakhat chu insumtheihna, mahni inthunna leh teirei kan peih loh vang ani, a ti a. Tunlai hian Zoram dung leh vangah kan thalaipuite ruihhlo in a suat mek a, infiammite lehzel ruihhlo laka kan fihlim loh chuan kan mikhual ruihhlo hian kan nun nasa takin a suat ang a, kan hmalam hun hi a ngaihtuah awm hle dawn a ni, a ti bawk.
Kan sorkar hmalaknain Sports Infrastructure lamah nasa takin hmasawnna min hmuh tir a. He hmasawnna hi hmang tangkaitu nih tum ila, theihtawp i chhuah zel ang u, a ti a. Infiamna discipline hrang hrang te a ti tak tak tu te chuan eizawnna leh chhungkaw chawmna atan an hmang tawh a. Keini pawhin chu chu kan ti ve thei ani, tih hria ila. Zirnaah thiamna sang tak tak nei eizawnna mumal nei lo tam tak te an awm a. Keini pawh zirna ah sang tak ni lo mah ila, kan thiamna hmangin eizawnna tha kan nei tih hria a, infiamna hi kan kalpui a hun tawh a ni, a ti bawk.
Pu Elvis Lalthangzuala chuan, infiammi tan Disciplines neih that a tul thu sawiin, hruaitute zahna chang hre tur leh an mahni avanga tuna an dinhmun thleng thei leh phochhuak thei an nihna hre reng turin kalkhawmte chu a chah a, inelnaa tel zawng zawngte duhsakna a hlan a, spike-off na a nei chhunzawm nghal a ni.
District Volleyball Association Lawngtlai Opening Season Tournament 2023 hawnna hi Pu K. Lalromawia, DVAL President in a kaihruai a. Pu M. Lalramsiama, General Secretary in report a pe bawk. Tun tum tournament ah hian Mipa Volleyball team 10 leh hmeichhia Volleyball team 6 te an tel a. September 29, 2023 hian Final khelh ani ang.
District Volleyball Association Lawngtlai hnuaiah hian Affiliated club 21 (Mipa 13, hmeichhia 8) an awm mek a ni.
Post a Comment