September 27, 2023 : Lawngtlai District-in kum 25 (Silver Jubilee) a tlin lawmna chu vawiin chawhnu khan Lawngtlai Deputy Commissioner Pisa tualzawlah hman a ni. He hun hi Pu H. Biakzauva, Deputy Speaker chuan a hmanpui a. Pu C. Ngunlianchunga, MLA, Lawngtlai West bialtu, LADC a Executive Member-te, Lawngtlai district chhunga sawrkar pisa hrang hrang hotute, khawtlang leh tlawmngai pawl hruaitute he hun ah hian an tel a ni.
Khuallian Pu H. Biakzauva, Deputy Speaker chuan Lawngtlai district-in kum 25 a chuankai theih nana district dinhmun hmu tur a mi ṭhahnemngai leh inpe tak takte hmalakna tarlangin zahna chibai a buk a. An inpekna leh an ṭhahnemngaihna te hlut sak a, an mitthla ang ngei a kawng hrang hrang a District hmasawn a nih zel theih nan mipui inlungrualna leh ṭanrualna ṭha awmna district a siam zel turin kalkhawmte a chah. Sawrkar hmalakna inkhairual a awm theih nan Lawngtlai district chhung a khaw ṭhenkhat, kalpawh har deuhte chu hneh zawk a vil a nih theih nan hmalak mek a nih thu Pu H. Biakzauva chuan sawiin hna sawt zawk a kalpui a nih theih nan State sawrkar hnuai a thawktute leh Autonomous District Council hnuai a thawktute inkarah thawhhona ṭha siam thiam a pawimawh thu a sawi. Ram dang nen a inkalpawhna changtlung tak a awm theih nan Lawngtlai district chhungah hmalakna lian tak kalpui mek a nih thu Deputy Speaker chuan sawiin sumdawnna hmunpui leh Mizoram luhkapui ni tur a inpuahchah a ṭul thu a sawi bawk a ni.
Pu C. Ngunlianchunga, MLA chuan Lawngtlaiin District dinhmun a luah theih nana khatih hunlai a Sawrkar a thuneihna chelhtute hmalakna fakawm a tih thu sawiin khatih hunlai a Chief Executive Member Pu F. Rohnuna, Minister Pu ST Rualiapa leh MLA Pu Sapliana Vandir te hmalakna kha hmalakna pawimawh tak a nih thu a sawi. Harsatna leh retheihna atanga khai chhuah kan nih theih nana District dinhmun pek kan ni chu hlut thiam a, District changkang, hmasawnna inkhairual leh kawng hrang hranga entawntlak ni turin Sawrkar thawktute leh mipuite a chah bawk a ni.
Lawngtlai district kum 25 tlin lawmna hun ah hian Pu Abraham Beirazi Khithie, Addl. DC chuan kalkhawmte lawmna thu sawiin Pu Samuel Lalmalsawma Sailo, SDC chuan Lawngtlai district din chhoh dan chanchin tarlanna hun a hmang a. Pi Malsawmtluangi, Superintendent chuan Silver Jubilee lawm tur a inpuahchahna kalpui dan tlangpui tarlangin Pi Margaret J. Vanlalremmawii, SDO (C) chuan lawmthu sawina hun a hmang bawk a ni. DC Office-a thawktute zing a boral ta te sunna hun hman niin District Silver Jubilee pual a lehkhabu leh Momento tlangzarh a ni bawk.
Post a Comment