August 21, 2023 (Rauthla) : Goverment Higher Secondary School leh High School, Siaha zirlaite chu vawiin khan an school kawtzawl-ah pungkhawmin, sorkar laka an lungawilohna lantirin, lungawilohna thuziak hrang hrang an keng.
Zirlai hruaitute chuan an school complex chhungah sorkarin Futsal Ground siam a tum tih sawiin, work order pawh a chhuak vek tawh a, Futsal Ground hi ni 18 chhunga thawh tur niin, a thawh tan hun tur an hriat loh thu an sawi a, hnathawh tan mai theih turin ruahmanna a awm tih an sawi bawk. Zirlai hruaitute chuan hetiang public property an school complex-a siam a ni tur chu an duh loh thu an sawi a. Mizoram sorkara Education Department-ah an lungawiloh thu leh work order pawh sut tura an ngenna Mara Student's Organistion (MSO) kaltlangin lehkha an thehluh tawh thu an sawi bawk.
MSO hruaitute chuan Siaha-ah sports lam hmasawnna chi khat Futsal Ground siam a ni tur chu lawmmawm an tih rualin, School complex-a siam tura ruahman a ni chu awmlo an tih thu sawiin, sorkarin hmun dang ngaihtuah se an duh thu an sawi bawk.
Post a Comment