August 21, 2023, Lawngtlai : Vawiin khan Lawngtlai DC Pu H. Lalhmingthanga hovin DC Office Chamber ah National Highway 54 hnathawktute, Lawngtlai District Land Owners’ Association hruaitute, Central Young Lai Association hruaitute leh Sorkar Official ten meeting an nei a. Lawngtlai District chhunga National Highway siam hna thawh mek leh Kaladan Multi Modal Transit Transport Project zangnadawmna ngiat a, Lawngtlai District Land Owner Association ten sorkar an nawr mek chungchang sawiho a ni. 

Lawngtlai DC Pu H. Lalhmingthanga chuan kawngpui pahnih chu District mipuite inkal pawhna leh ei leh bar thiar velna kawng pawimawh tak ve ve a nih avangin ṭha taka siam leh enkawl a ṭul a. Ram tana thil ṭha duh avanga kawng ṭha neih duha hma lakna chu thil lawmawm tak niin, District mipuite tuarna thlen thei zawnga hma lakna erawh awm lo hram se ṭha a tha hle, a ti.

Meeting ah hian National Highway 54, Lawngtlai leh Kawlchaw inkara hnathawh chhe lutuk ni a an hriat vanga Central YLA hmalaknaah, August 18, 2023 khan Central YLA hruaitute leh hnathawktu Company hotu ten hna tha lo lai a hmunah enho vin, hna tha zawka thlak tura inbiakrem a nih vangin August 8, 2023 atanga Lawngtlaia NHIDCL leh ICT Office khar pawh hawn a nih tawh thu sawilan niin, hna tha zawk a awm theih nan mahni zawnah hmalakna kalpui theuh nise an ti.

He hunah hian Kaladan Multi Modal Transit Transport Project kawngpui, kum 2010 atanga hnathawh tan, Lawngtlai atanga Zochhuahchhuah inkara sialin an ram a tihchhiatsakte intelkhawm, Lawngtlai District Land Owners’ Assocition hruaitute chuan kum 14 zet zangnadawmna phuta hma an lo lak tawh thute, a kawtawpah an tan tawh thu leh August 1, 2023 atanga Deputy Conservator of Forest (Wildlife) Office,  Chhimtuipui Wildlife Division  Lawngtlai chu Office kaithei lova an dan thu leh KMMTTP kawngpuia hnathawktu Company te pawh an chhetchhuah an remtih loh thu an sawi a. Lawngtlai DC Pu H. Lalhmingthanga chuan Ram neitu intelkhawmte hmalakna vangin District chhim lam leh khawthlang lam mipui ten an tuar tan tawh tih sawiin, kawngpui sialtlang a nih theih nan hnathawktute chetchhuah an remtih loh chu titawp turin Ram neitute chu a ngen a, Land Owners Association hruaitute chuan an mutan ber ni a an ngaih chu Mizoram sorkar hnuaia Environment, Forest & Climate Change Department an nih thu sawiin, Deputy Commissioner in a ngenna chu zahawm an tih thu leh General Body Meeting kova an lo sawizui tur thu an sawi.

Post a Comment

Powered by Blogger.