August 31, 2023, Lawngtlai : MJA Lawngtlai District leh District Election Office, Lawngtlai tangkawp buatsaihin vawiin khan Lawngtlai Press Club ah Political Party hrang hranga IT & Media Cell te pualin Media Awareness Campaign neih a ni.
He hun hmanpuitu Election Officer Pu Denny Lalchhuanawma chuan Assembly inthlanpui kan hmachhawn dawn a, election felfai leh dik a awm theih nan Political Party te pawimawhna a lianin, a hnuk pawimawh ber a ni, a ti a. Inthlanna boruak fel leh fel loh ah Political Party sukthlek a pawimawh a, boruak tha siam tura hmalakna nasa zawk kalpui zel turin a ngen a. Election Commission of India in kaihhruaina hrang hrang a siam a, hengte hi thataka kan zawm chuan inthlanna a felfai ngei ngei ang a ti a, Political Party leh mipui lam pawn inthlan kaihhnawihah hriatduh an neihte hrilhfiah turin Election office chu a inhawng reng a ni, a ti.
Lawngtlai District MJA President Pu Lalngheta Ralte chuan Political Party a Media lama mawhphurhna neite chu an sukthlek, an thu thehdarh duh leh tawngkauchheh thlengin mipui kaihruaitu ber an nih vangin fimkhur leh puitling zawka kal tura ngenin, Political Party te Media an hman tangkaia an hmanthiam leh thiamloh ah ram sukthlek a kal fuhin a kal fuh lo thei, a ti a. Political Party hrang hranga Media te leh Journalist ten thawhhona tha tak an nei chu MJA President chuan lawmawm a tih thu a sawi bawk.
Media Awareness Campaign ah hian BJP, INC, MNF leh ZPM a IT & Media aiawh te telin, chawhma hun chu Pu Lalchharliana Lawngtlai District MJA General Secretary-in kaihruaiin, chawhnu hun chu District MJA Vice President Pu Elvis Lalthangzuala'n a kaihruai thung.
Post a Comment